Miaurelio, ina maula magliadruna e massa helis

DA SUSI ROTHMUND / ANR

Ier ha la musica da tscheiver Ils Vagabunds envidau al til da gievgia grassa cun sera da barlot a Sedrun e massa amitgs dil tscheiver da lunsch e da maneivel han dau suatientscha da fina bialaura. Siat musicas da tscheiver e dudisch gruppas ein seformadas tier in til plein temperament, divertiment e humor empauet murdent. Empalau il til naven dalla staziun a Camischolas e tras igl entir vitg han Ils Vagabunds cun melodias che dattan tempra tscheivrila. Els ein vegni suandai dil zoo dalla gruppa da Mupi e dalla maula magliadruna dalla scoletta. Sujets zun carins ch’han dau dabia lavur da preparar. El tact dalla musica dallas Fifferlottas ein las miurs dall’emprema e secunda classa marschadas ed ils Royals han fiers confettis sco sch’ei vegness scumandau per adina. Las Patlaunas han dau en il tun pils rappers 1 tut quaders dalla tiarza e quarta classa. Ina gruppa fideivla al tscheiver ein Ils Frabiziechels ed els han ina ga dapli schau ora cups e construiu in helicopter à la Kamov. «Röttöttöttööö… usché tuni alla Val Tujetsch» steva ei scret sin in placat ed aschia ha ei pilver tunau dis en e dis ora igl onn vargau. Quei ha era motivau ils scolars dalla sisavla classa da zambergiar helis e numnar quels svegliarins. Las Zoclas han perfin saltau ed era ina nova gruppa «RTR rapporta» ei separticipada al til. Quella ei seformada cuort suenter l’emissiun dils Cuntrasts davart igl emigrant tuatschin «Miaurelio» ch’ei partius cun velo a Sedrun per viver ina nova veta en Tailanda. Las Lieurs han sunau suandai dils rappers 2 e la banda da stiarls ha tematisau la midada dil clima. 079…halla detg… tüt, tüt, tüt… scolaras e scolars dil scalem superiur han seschau inspirar dil hit da Lo & Leduc. Las Latiarnas e Las Bagordas han schau ora cups e las Vanzadiras han priu sco motto per lur carr l’integraziun dalla posta el Denner. Ei han sittau in tschuat pupi manizzau e confettis sils presents ed enqualin po sedumandar sche quei ei stau ina gronda part dalla posta dils davos meins.