Festa federala da tir 2025 a Cuira?

DA GION NUTEGN STGIER / ANR

Tema central da la radunanza da delegads è stada la votaziun da la nova lescha federala davart las armas. La federaziun ha cun Rudolf Schwendeler in nov suprastant. Marcus Caduff e Hubert Tomaschett han retschet la commembranza d’onur da l’uniun superiura dals tiradurs. Carl Frischknecht, (Tumegl), il president da la Federaziun grischuna dal sport da tir (BSV), è sa mussà cuntent che 154 delegads han chattà la via a Tumegl per assister a la radunanza annuala da l’uniun tetgala dals tiradurs grischuns. Preschents a l’occurrenza eran er ils dus cussegliers guvernativs Mario Cavigelli e Marcus Caduff. Quel n’ha dentant betg represchentà la regenza, mabain è Caduff stà envidà sco president dal comité d’organisaziun da la Festa da tir chantunala 2018 en Surselva. Da la partida a la radunanza da delegads èn er stads ulteriurs represchentants da la politica regiunala, chantunala e naziunala. Per exempel eran quai cussegliera naziunala Magdalena Martullo ed ils dus cussegliers naziunals Heinz Brand e Duri Campell. Adina preschent è er divisiunari Lucas Caduff, el ch’ha represchentà l’armada svizra.

Success cun il sponsuradi

L’onn passà è la Federaziun grischuna dal sport da tir ida a la tschertga da sponsurs per meglierar la situaziun finanziala. Per l’uniun cun 5000 commembers e da quels 2600 tiradurs activs è la tschertga stada in success. Set sponsurs èn sa mussads fitg generus cun la federaziun, tranter auter la Banca chantunala sco sponsur principal. La finamira da Frischknecht cun ses suprastants è stada da manar la federaziun sin ina basa finanziala sauna, quai ch’è 
alur er reussì, er grazia al sponsuradi generus.

Politicamain neutral

Er sche la suprastanza da la Federaziun grischuna dal sport da tir saja cunter las novas directivas davart la lescha federala da las armas saja l’associaziun politicamain neutrala, ha ditg Frischknecht. Ils tiradurs hajan d’esser cunter quellas directivas da l’UE e vuschar ils 19 da matg 2019 cunter quella lescha. Cunter quellas directivas da Brüssel han lura referì cussegliera naziunala Magdalena Martullo e Bernhard Lampert, il president dals tiradurs veterans svizzers. Per la nova lescha federala davart las armas ha discurrì cusseglier naziunal Duri Campell. Envers el èn intgins preschents sa depurtads impertinents.

Dapli che be 
ina tradiziun

Cusseglier guvernativ Mario Cavigelli ha ditg en ses pled ch’il tir saja en il Grischun bler dapli che be ina tradiziun. Na, il tir saja sco la chatscha cultura, passiun societad e colleghialitad. Tiradus e chatschadurs hajan er l’experientscha da vegnir a frida cun in’arma, els hajan fidanza en quella ed er èn la manipulaziun da l’arma. Per il sistem da segirezza e per l’armada sajan ils tiradurs ina ferma forza, ha ditg divisunari Lucas Caduff, el che stat al timun da la Divisiun territoriala 3.

Trais novs commembers d’onur

Da nov a la suprastanza da la Federaziun grischuna dal sport da tir appartegna Rudolf Schwendeler (Eigias-Lanquart). En quel gremi remplazza el Walter Umbricht (Tavau-Glaris), l’um ch’è sa retratg suenter otg onns sco schef da la partiziun furmaziun e promoziun dals tiradurs giuvens. Reelegì sco schef dal sport da prestaziun è vegnì Hubert Tomaschett (Rabius). El ha er retschet la meritaivla commembranza d’onur da la federaziun, quai ch’è er il cas per Walter Umbricht. Da nov commember d’onur da l’uniun tetgala dals tiradurs grischuns è er Marcus Caduff (Morissen) cun esser stà in president fidà dal comité d’organisaziun da la Festa da tir chantunala 2018 en Surselva cun bunamain 8000 participants.

Las cundiziuns da basa 
èn enconuschentas

Il 1985 ha gì lieu a Cuira la Festa federala da tir. Ussa duai quella puspè avair lieu en la chapitala dal Grischun ed en auters lieus da noss chantun. Il 2025 duajan 40 000 tiradurs vegnir en noss chantun per assister a la Festa federala da tir. Als iniziants da Cuira 2025 èn las cundiziuns da basa da l’Uniun svira dals tiradurs (SSV) enconuschentas. La regenza, quella ha gia mussà intgins segns positivs da sustegnair l’occurrenza naziunala, da la quala il turissem e l’economia duessan profitar. Dal reminent, la Festa federala da tir 2020, quella ha lieu durant la stad en il chantun Lucerna. La Festa da tir chantunala 2023, quella duai avair lieu en l’Engiadina, la Val Müstair, il Puschlav e la Bregaglia, è vegnì ditg uffizialmain a Tumegl.