Termin: Collisiun tranter e-bike ed auto

A Termin è ina dunna cun e-bike sa blessada mez grev suenter ina collisiun cun in auto. La dumengia saira è in automobilist da 58 onns charrà dal Cholplatzweg en direcziun vitg sura da Termin. Il medem mument era la ciclista da 57 onns cun ses velo electric sin viadi en la direcziun cuntraria. En ina curva hai dà ina strivlada tranter l’auto e la dunna cun ses velo, scriva la polizia chantunala. Sinaquai saja la dunna (che na purtava nagina chapellina) cupitgada e dada giu ferm sin la via cun ses chau. L’ambulanza ha transportà la dunna blessada en l’Ospital chantunal a Cuira.

Ad Aschera ha in chaun da tschertga dal Club alpin svizzer CAS chattà viva ina dunna sparida. Quai communitgescha la polizia chantunala. La dunna da 74 onns valeva dapi la dumengia saira sco sparida. Er participads a l’acziun da retschertga èn stads ils pumpiers, la polizia e lavurers da la vischnanca. La Rega ha transportà la blessada en l’Ospital chantunal a Son Gagl.

Il concern d’energia svizzer Alpiq scriva vinavant cifras cotschnas. Il 2018 ha Alpiq fatg ina perdita da 260 milliuns. La svieuta munta a 5,2 milliardas. Sco raschun per la perdita numna Alpiq tranter auter ils pretschs d’energia che sajan stads sut ils custs da producziun. Pervi dal resultat ston ils acziunaris er quest onn desister d’ina dividenda. Suenter ch’il concern d’energia ha vendì sia sparta d’industria e suenter ch’el è returnà a la fatschenta tradiziunala, la producziun d’energia, è per Alpiq dumagnà il «turnaround». Cun vender la sparta d’industria ha Alpiq vulì reducir ils daivets. L’indebitament brut è sa sminuì il 2018 per radund 600 milliuns sin 1,5 milliardas.

Actualmain offreschan falsifitgaders marcas postalas dad in franc falsifitgadas. Pliras firmas hajan gia cumprà talas marcas cun gronds rabats, quai scriva la Procura publica da Basilea-Citad. Las marcas falsifitgadas cun la staziun da Lucerna sco motiv sajan da fitg buna qualitad.