Curs da rumantsch online

(cp) La Lia Rumantscha (LR) sa legra da preschentar sia nova plattafurma online per ils curs da rumantsch. Da nov chatt’ins tut ils curs da lingua organisads da la LR sin la pagina d’internet www.curs.ch. Quella è concepida en in design frestg e favuraivel per ils utilisaders. La Lia Rumantscha porscha curs da lingua en tut ils tschintg idioms sco er en rumantsch grischun. A partir d’immediat èn quels tuts unids sin la nova pagina d’internet www.curs.ch. Sajan quai curs da l’emna, curs da vacanzas u curs da crash, saja quai per principiants u per avanzads: Sin la nova pagina-web chatt’ins tut ils curs cun in clic. Sper il design survesaivel han ins dà blera paisa ad ina simpla procedura d’annunzia. Er ils auters purschiders da curs da rumantsch èn visibels sin la pagina. Sch’ins na chatta nagina offerta adattada organisescha la LR sin dumonda era curs privats – concepids tenor ils basegns e las cumpetenzas individualas. La nova pagina da curs porscha ultra da quai er in program aposta per las Rumantschas ed ils Rumantschs che vulan perfecziunar lur cumpetenzas linguisticas. Quel cumpiglia per exempel curs spezials per emploiads communals, collavuraturas da medias u persunas d’instrucziun. La nova plattafurma www.curs.ch è il resultat d’ina restructuraziun dals curs da rumantsch da la Lia Rumantscha. Tut ils curs da rumantsch da la LR vegnan organisads e coordinads uss a moda centrala. La nova plattafurma è vegnida creada dal graficher rumantsch Remo Caminada. Las fotografias da la natira dal Grischun èn da Marcel Volken.