Catscheders a tgatscha da medaglias

(fc) Per la 9. geda ò gia li la Coppa mundiala da skis da catscheders. Chest onn agl «Tegernsee» ainten la Bavaria. Scu gio varsaquants onns è stada durant quatter deis la Coppa mundiala da catscheders. E scu er varsaquants onns puspe cun participaziun surmirana. Chest onn digls 21 anfignen igls 24 da favrer.

Tge è ansomma la Coppa mundiala?

L’ideia è nascheida ainten la «patria» dalla coppa, agl Montafon. Gertrud e Stefan Tschohl, passiunos catscheders e hoteliers, on invento chest event spezial per inscunters naziunals e mundials dallas rassas verdas an ena moda sur en pêr deis per aveir peda da barattar or evenimaints da tgatscha, battarladas sur dallas differentas modas e leschas da tgatscha. Arrundo è igl antier tramblamaint cun bunga culinarica e bavrondas.

Scu menziuno è igl Montafon la tgigna da tala coppa e chels on en schinumno patent segl evenimaint. Mintga dus onns vign igl li d’occurrenza surdo an en’otra tera. Quatter gedas ègl ia sur la tribuna agl Montafon, treis gedas a Son Murezza/Silvaplana, igl 2017 agl Sarntal agl Tirol digl sid, e chest onn ainten la regiun digl Tegernsee. Per igl giubileum da 10 onns vign puspe organiso igl proxim onn agl Montafon.

Scu funcziunga igl event?

Igl venderde è adegna l’occurrenza da sagettar cugl schluppet da tgatscha mess a disposiziun. Dad onn tar onn variescha la scheba. Gl’è da sagettar tot sagond sen la glioir curronta u sen la scheba da tgamutsch, muntanela, capriol u golp. E chegl er an las differentas modas. Tschanto, taro ni an peis, puso u liber. Igl migler tiradour vign naturalmaintg onoro cun en premi. Supplementar niss igl resultat valuto per la cursa dalla sonda. An cass da treid’ora lez de. La disciplina principala è la sonda. Mintga participant/a ò da far dus gedas igl madem parcurs dad en slalom gigant. Scretg avant è tgi la cursa ò da neir absolveida an tenue da tgatscha. Cò èn propa da vaseir tips interessants ed originals cun en vischmaint fatg sezs or dallas differentas pels da selvaschigna!

Tar mintga curreida è anc da neir sagetto cun schluppet da caliber pitschen sen mintgamai tschintg schebas da biatlon, e chegl ainfra 60 secundas.

Per la rangaziun vign pero betg chinto igl pi spert, mabagn la differenza digl taimp dallas dus curreidas. Chella vess agl migler cass dad esser schi minima scu pussebla per davantar campiun mundial. Agiunto a chel taimp vign anc ena secunda per mintga rondella da biatlon betg cupitgeida. Supplementar vign anc chinto vetiers igl taimp da castei sch’ins ò surtratg las 60 secundas per igl sagettar, e chegl an secundas.

Delegaziun da Surses

Nous set Sursetters, an dus autos bagn amplanias cun valischas ed equipamaint da skis, ischan partias la gievgia dumang vers la Bavaria digl sid cun bunga luna e plagn ambiziuns da turnar a tga cugl butgal. Tar l’arrivada è sto gl’amprem da s’annunztgier tar igl biro d’organisaziun e piglier ancunter en lascher plagn infurmaziuns pigls proxims deis. La seira è alloura stada l’avertura uffiziala agl hotel «Maier zum Kirschner» a Rottach-Egern. An steivas da stil bavares, orno cun belas trofeas dalla regiun vainsa galdia ena stupenta tschagna cun en bung got vegn, displaschevlamaintg cun pitost pac plaz ved meisa. Las localitads eran en po sotdimensiunadas per vers 220 catschedras e catscheders. Igl venderde ischans nias carros cugl bus local agl stand da sagettar. Gl’è sto ena surpresa tgi chel andamaint sa cattava cumplettamaintg sutterran e chegl er tar las schebas da distanza da 100 m. Ainten l’ustareia sur tera vainsa alloura gusto las «liongias alvas» tradiziunalas cugl brezel.

La seira vainsa visito ena localitad scu fatga pigls Sursetters, igl «Herzogliches Bräustüberl». En bietg imposant noua tgi vign produtgia la bira regiunala, en’ustareia cun betg manc da 600 plazzas agl intern ed 800 sen la terrassa alla riva digl lai.

Zont surstos ischans stos dalla curtascheia cun caracter patgific, ma betg manc dalla servitet speditiva. Malgro dad esser sto occupo mintga plaz sot igls imposants artgs da meir èn las bungas speisas tradiziunalas e las biras neidas purtatas an en curt taimp.

La sonda seira, siva aveir frequento la cursa agl territori da skis «Sonnenbichel» a Bad Wiessee – cò èn digl reminent er gio stadas cursas da FIS – è alloura stada la rangaziun agl «Gut Kaltenbrunn» a Gmund. Dalla parteida era er la dutgessa Elisabetha or dalla tgesa royala dalla Bavaria. Cun tensiun è nia tadlo ed onoro la nova campiunessa ed igl nov campiun mundial da skis da catscheders.

Plaschevlamaintg ò en Sursetter pudia piglier ancunter igl premi per igl terz plaz! Siva d’aveir galdia igl diner, la musica da solt ed igl bal da catscheders ischans alloura ias a letg per esser pronts per piglier sot las rodas la dumengia dumang igl viadi a tgesa. Sangs e frestgs, amplanias cun deis da bunga cumpagneia e regurdientschas ischans puspe stos leds e cuntaints cura tgi la vallada da splendour ans è puspe sa daverta a Burvagn!