En favur dalla Talina

(anr/ac) La giuventetgna tuatschina s’engascha per la renovaziun dall’atgna localitad da giuventetgna a Sedrun. Dacuort cun ina fiera da plugls a Sedrun. Igl agen engaschi en favur dalla localitad da sentupada per la giuventetgna tuatschina ei part dil concept, ha la promotura da Giuventetgna Cadi Gabriela Cabalzar explicau. E per quei intent ha la giuventetgna organisau ina fiera da plugls ell’aula da Sedrun. Talina senumna il local da sentupada e sco quei che Cabalzar ha explicau ein diversas renovaziuns gia succedidas, autras planisadas. Denter auter duei il local retscheiver in niev plantschiu. Bein contribuescha la vischnaunca da Tujetsch allas investiziuns, parzialmein sto la giuventetgna s’engaschar. Cun il resun sin la fiera da plugls ei la promotura da giuventetgna cuntenza ton davart digl interess dalla populaziun sco davart digl engaschi dils giuvenils. Buca sulet ina fiera da plugls ha generau entradas, mobein era ina stiva da caffè.