In niev portatun numnaus «Pèrlas rumantschas III»

(anr/ff) Dumengia proxima pren il project «Pèrlas rumantschas» sia cuntinuaziun cun ina tiarza ediziun en fuorma d’in disc cumpact e cun igl emprem concert da batten dil portatun. Il success da Pèrlas rumantschas I e II ha intimau igl iniziant Corsin Tuor da crear la tiarza ediziun dil project. La versiun I ha cunteniu arranschaments da canzuns romontschas per musica da brass. Tier la versiun II dallas pèrlas ei igl ensemble deCanto, pia in chor viril, semess ellas retschas dalla Brass Band Berner Oberland per embellir cun cant las presentaziuns.

Ina nova via ein ils protagonists dil project Pèrlas rumantschas III i ed han registrau melodias instrumentalas, cantatas e cant accumpignaus da brass band. Igl arcun da canzuns romontschas ha era quella gada cunteniu avunda cumposiziuns che van sut il predicat «pèrlas». Il dirigent e cau responsabel dil project Corsin Tuor fa menziun: «Ils treis dirigents Clau Scherrer, Christian Klucker ed jeu essan s’entupai a Cuera cun in mantun canzuns el sacados. Leu havein nus selecziunau massa canzuns da differents cumponists romontschs. Ils criteris havein nus tschentau sin la qualitad musicala.» Uss ei igl auditur zun spanegiaus co ils arranschaments dallas canzuns da Tumasch e Benedetg Dolf, Armon e Robert Cantieni, Giusep Maissen, Gion Antoni Derungs, Gion Balzer Casanova e Hans Lavater tunan. Aschia ein tuttas regiuns e tuts idioms romontschs risguardai. Il cuntegn cun viarva dils poets Florian Grand, Jon Guidon, Gian Fontana, Chasper Schleier, Armon Cantieni, Gion Deplazes ed Arnold Spescha resplenda noss’identitad, nies patertgar e nossa carezia per nies lungatg. Las ovras ein buca scazis spari, mobein segns da sentiments actuals da nossa societad. Ils arranschaders da lur vart derivan medemamein ord tuttas parts linguisticas dalla Svizra. Da nossa part romontscha segnan Corsin Tuor ed Alvin Muoth persuenter.

Las pèrlas precedentas ein stadas presentadas sin tribuna internaziunala ed han purtau la buna reputaziun al romontsch. La tiarza e part finala dalla trilogia vegn a contonscher medem success e cumpletescha il project «Pèrlas rumantschas». Per quei garant stattan ils renomai dirigents Tuor, Scherrer e Klucker cun lur formaziuns d’emprema classa e qualitad Brass Band Berner Oberland sco era ils chors mischedai Cantus Firmus ed Incantanti.

Concerts da batten dil disc cumpact «Pèrlas rumantschas III»:

Dumengia, 10 da mars 2019, 16.00, Französische Kirche Bern

Sonda, 16 da mars 2019, 20.00, sala polivalenta Trun a caschun dil Festival da la chanzun rumantscha.