Brinzauls: Scumond general d’entrar en zona da privel

(rtr) La bova da Brinzauls davent’in privel pli grond la primavaira e perquai vala da nov in scumond general d’entrar en questa zona da privel. Quai ha la vischnanca d’Alvra publitgà en il Fegl uffizial. Pervi dal grond privel actual da la bova da Brinzauls ha la suprastanza communala Albula/Alvra decidì da scumandar general d’entrar en la zona da privel. Tgi che cuntrafetschia al scumond stoppia quintar cun ina multa da fin a 5000 francs. Il mument na saja betg pussaivel da dir quant ditg ch’il scumond d’entrar en la zona duai cuzzar, ha declera il president da vischnanca Daniel Albertin a la gasetta «Südostschweiz». Per il scumond da bajegiar a Brinzauls haja la vischnanca inoltrà al chantun ina dumonda per prolungar quel per dus onns. Las examinaziuns da l’uffizi per guaud e privels da la natira per pudair sanar la zona cuzzian almain anc uschè ditg. Tenor Albertin vegnia preparà il mument in segund lieu per far perfuraziuns, dasper la via chantunala tranter Casti e Surava. Plinavant vegnian ulteriurs lieus examinads per pudair far perfuraziuns.