Di svizzer a la cuorsa da Malögia 
a S-chanf

DA BENEDICT STECHER / ANR

In dumengia ha gnü lö il 51avel Maraton da skis engiadinais cun 14 200 atletas ed atlets. Dario Cologna ha guadagnà la cuorsa pro’ls homens e Nathalie von Siebenthal pro las duonnas. Il 51avel Maraton da skis engiadinais da Malögia a S-chanf ha gnü lö pro fich bunas relaziuns da naiv e pro ora mediocra.

Ils organisatuors, a lur testa Menduri Kasper, vaivan decis da limitar il nomer da partecipantas e partecipants sün 14 200 per mantgnair inavant la buna qualità da la cuorsa.

Per pussibiltar als partecipants da rivar a temp a la partenza e da pudair ir davo la cuorsa vers chasa sainza gronds impedimaints sun gnüts organisats da la Viafier retica var 160 trens specials, implü eir var 60 bus d’auto da posta da la Svizra dal ost. Amo dürant l’ultima eivna avant la cuorsa as vaivan annunzchats divers atlets da renom mundial sco Dario Cologna e bod tuot la squadra da la Frantscha, Anders Gloeersen, Ilya Chernousov e divers oters. Eir Roman Furger, il vendschader da l’on passà, d’eira preschaint, uschè cha per tensiun d’eira pisserà.

A la partenza a Malögia s’ha muossà perfin il tschêl blau e las loipas s’han preschantadas in ün fich bun stadi.

Dario Cologna e 
Nathalie von Siebenthal

Bainbod davo la partenza a Malögia s’ha fuormada üna gruppa cun tuot ils stars a la testa. Eir a Puntraschigna ed a La Punt d’eiran amo adüna ils istess davantvart. Tanter oter eir il giuven Cédric Steiner da Tavo chi ha muossà üna fich buna cuorsa ed es dvantà per finir tschinchavel. Cuort avant il böt haja dat ün sprint cha Cologna ha guadagnà ed ha realisà ün nouv record cun 1:22.22,9 avant Jean-Marc Gaillard da la Frantscha ed Anders Gloeersen da la Norvegia. Las duonnas chi d’eiran partidas a Malögia cun ün avantag da tschinch minutas sun stattas davantvart fin pro la schanza a San Murezzan. La Svizra Nathalie von Siebenthal es rivada sco prüma da las duonnas i’l böt immez ils homens ed ha guadagnà la cuorsa cun 1:30.41,1 avant Astrid Oeyere Slind da la Norvegia e Britta Johansson Norgren la Svezia. Pro’l scumpart dals premis d’eira preschaint il president da la regenza grischuna, Jon Domenic Parolini: «Evenimaints sco la cuorsa dal Maraton engiadinais sun d’importanza centrala, üna jada per la populaziun indigena, ma eir pel chantun Grischun sco chantun da turissem. Pel sport da skis ha la cuorsa üna valur enorma. Schi’s vezza cha la cuorsa es gnüda manada tras hoz per la 51avla jada cun üna partecipaziun surprendenta, lura as poja be dir sinceras gratulaziuns ed ün schlass grazia fich als respunsabels e’ls agüdants.»

1200 voluntaris per garantir 
üna cuorsa optimala

Kasper ha pudü trar ün facit positiv: «La sonda saira haja amo plovü sün bod tuot la stricha dal maraton, sur not sun las temperaturas idas suot nolla grads ed hoz a bunura vaina lura pudü preparar il traget in möd optimal. Il punct sül i sun lura stattas la victorias da Nathalie von Siebenthal e da Dario Cologna chi han pisserà per ün di svizzer.» El deplorescha ün pa chi’s discuorra impustüt be da la cuorsa dal maraton da dumengia. L’idea füss chi vain discurrü da l’eivna dal maraton cun diversas otras cuorsas fich attractivas. La gestiun dal Maraton da skis engiadinais es occupada tuot on ed il böt füss d’organisar eir oters evenimaints sportivs e da’s sviluppar sco center per events e per oters arrandschamaints regiunals. «Per organisar il maraton dispuona l’organisaziun da var 1200 voluntaris chi vegnan recrutats dals clubs da skis da la regiun. Quels sun respunsabels d’avair glieud avuonda per lur traget. La naiv, l’ora e las temperaturas chodas saran eir in avegnir üna gronda sfida per l’organisaziun dal Maraton da skis engiadinais», ha dit Kasper.

Ulteriurs resultats as chatta sülla pagina d’internet: www.engadin-skimarathon.ch sül linc dals resultats.

Guarda eir paginas 4, 5 e 6