Galdia l’ambianza sot tschiel avert

(anr/gns) Per l’amprema geda sa participo agl mez maraton dalla Nagiadegna è er en pêr dalla Hollanda. Gerrit Jan e Barbara Konijnenberg èn 40 onns giasts digl hotel Post a Beiva. Els vegian sa divertia fitg e galdia la stupenta atmosfera, deian igl om e la donna. Igl resultat, chel seia secundar. Fatg dumengia passada igl mez maraton engiadines cun ena lunghezza da 21 km on 1989 omens e donnas. Tranter chels participants e participantas era cun Gerrit Jan e Barbara Konijnenberg er en pêr dalla Hollanda tgi stat siva digl 2003 a Luxemburg. Pigl om da 56 onns e per la donna da 54 onns è igl mez maraton engiadines sto ena premiera. Digl reminent èn el ed ella stos igls unics participants dalla Hollanda tranter las total 1989 persungas tgi èn parteidas a Maloja segl tratg da 21 km.

Ena ferma relaziun cun Beiva

Gerrit Jan e Barbara Konijnenberg canoschan la Nagiadegna gio blers onns er cun esser igl pêr 40 onns giasts digl hotel Post a Beiva. Cunzont la famiglia da Barbara Konijnenberg, la famiglia Scholten, totga tar la classa digls miglers giasts tgi igl hotel dalla famiglia Lanz ò. La stad veiva la mamma Marian Scholten cugl sies partenari a Florida ed igl anviern è ella adegna puspe a Beiva cun igls sies dus unfants, blers beadis ed ancunaschaints digl antier mond. Beiva ed igl hotel Post èn per la famiglia Scholten en paradis ed en li noua tgi vigl e gioven sa catta bagn. Chegl è er la raschung tgi Marian Scholten ed igls sies confamigliars èn puspe turnos a Beiva siva d’aveir fatg en pêr onns vacanzas d’anviern an Frantscha.

Mez maraton da correr

Barbara Konijnenberg rachinta tgi la stad fetschan ella ed igl sies om adegna puspe cursas da correr, detg pi precis mezs maratons. Sur igls meds digitals vegia ella catto chint tgi an Nagiadegna vigna er organiso en mez maraton da passlung. Cun saveir dad esser da chel taimp a Beiva vegian ella ed igl sies om sa decidia da s’annunztgier per chella cursa da 21 km. Sa tgapescha tgi igl pêr hollandes ò fatg la cursa sainza trenar mintga de e passantar lour taimp liber angal sen la loipa. Varsaquants deis avant igl mez maraton èn Gerrit Jan e Barbara Konijnenberg bagn stos ensatge daple segls skis da passlung, dantant ansomma betg surfatg.

Campiun hollandes da sagl cun skis

Gerrit Jan Konijnenberg dei tgi el sa regorda anc fitg bagn cura tgi la sia donna vegia dumando ad el sch’el mareida betg ella. Chegl seia sto a Beiva e chegl avant blers onns ainten la Lanzio Bar. Gist perchegl vegia er el ena relaziun speziala tar Beiva, menziunescha igl Hollandes. Ansomma cugl Grischun vegia el ena relaziun singulara. Da gioven fascheva el sagl cun skis ed igl sies trenader era Odilo Del Curto barmeir, igl bab d’Arno Del Curto. I seia bagn donn tgi a Son Murezza ins lascha eir an paglia la schanza da sagl cun skis, manegia el. Cun trenar bler sen chella seia el perfign nia plessas gedas campiun hollandes da sagl cun skis. Bel seia er tgi Odilo Del Curto ed er Arnoldo Lanz, barmeir e patrung digl hotel Post a Beiva seian stos an Hollanda per assister allas sias nozzas, dei igl pêr hollandes.

Gerrit Jan e Barbara Konijnenberg eran la seira siva digl mez maraton bagn en po stracs, dantant fatg viva sen la premiera on els tuttegna e chegl cun en bung got vegn taliang. L’atmosfera seia stada geniala ed er la cumpagneia vess betg savia esser miglra tar igl mez maraton, manegian igls giasts hollandes. Tgi els vegian duvro passa dus ouras per rivar anfignen Puntraschigna seia secundar, chegl tgi vala digl reminent er pigl plaz ainten la rangaziun.

Da sa participar alla cursa seia sto bler pi impurtant tgi igl resultat, dei Barbara Konijnenberg. Ella menziunescha tgi chella ambianza ins vegia d’aveir vasia cun igls agens îgls. An mintga cass vegia valia la pagna da neir da Luxemburg a Beiva per eir sur Gelgia e far igl mez maraton, an tots gros ena gronda aventura ed er ena particularitad fitg atgna, dei la donna da Holland.