Ina procedura per 23 plazzas da lavur

dad augustin beeli / anr

Ella vischnaunca da Trin ein ils plazs da baghegiar tschercai. Buca mo privats, era ils mistergners cun fatschenta che vulan ni ston adattar lur structuras ein limitai. A Trin Mulin ei il plan da quatier «Cahenzli» exponius dapresent. Trin ei dapi onns en ina fasa da carschen cuntinuada, grazia al tunnel eis ei dapi 25 onns ruasseivel en quella vischnaunca. Ins sa strusch pli s’imaginar ch’igl entir traffic sursilvan carrava tochen 1994 tras Trin Vitg ed agl ur da Trin Mulin. Oz ei la vischnaunca en ina situaziun ordvart favoreivla. Tgi che lavura el Plaun, Val dil Rein ni a Cuera anfla a Trin in domicil adattau. Denter auters immigrai han era dus cussegliers guvernativs viu ils avantatgs da quella vischnaunca. Luzi Bärtsch fuva vegnius a Trin Digg, ed era Peter Peyer habitescha dapi prest 20 onns leu. A famiglias porscha Trin quei ch’ellas giavischan: Structuras surveseivlas d’in vitg e colligiaziuns optimalas encunter Cuera ed encunter il center turistic Flem-Laax-Falera. Biars habitonts penduleschan mintga gi en omisduas direcziuns.

Dapi treis generaziuns

Denton buca tuts ston ir ordeifer a luvrar. Survetschs, mistregn, gastronomia e maun public porschan a Trin lavur a varga 135 persunas. Denter auter las ustrias Parlatsch, Casa Selva e Cas’Alva, la sedia dil Project Uaul da muntogna cugl albiert da giuventetgna, l’interpresa da baghegiar Casty, il niev luvratori forestal a Porclis sco era l’Ovra electrica. E buca d’emblidar la Cahenzli SA. Quella scrinaria e lennaria dat lavur a 23 persunas. Igl ei l’interpresa dil president communal Stefan Cahenzli. Quel ei pertuccaus actualmein d’in plan da quatier privat e la finamira eis ei da garantir ils plazs da lavur.

Dapi igl 1. da mars 2019 ei il plan da quatier «Cahenzli» exponius en casa communala. Claudia e Stefan Cahenzli-Erni meinan en tiarza generaziun la scrinaria e lennaria. Il tat da Stefan, Georg Cahenzli, haveva fundau quella firma pintga igl onn 1936, il bab Reto ha surpriu ed engrondiu ella. Gia dagitg emprova la tiarza generaziun da sligiar il problem culla munconza da plaz. Il menaschi ei carschius considerablamein, ei denton aunc adina el medem liug agl ur digl ual dalla Val Turnigla. Cheu traian ils da Trin a nez dapi tschentaners l’aua, seigi per resgias, mulins, e dapi varga 100 onns per la producziun d’energia electrica. La scrinaria e lennaria Cahenzli ei pia dapi 83 onns el medem liug, las relaziuns ein denton semidadas. Normas e maschinas ein s’accumuladas, ed era ils vehichels drovan dapli plaz. In menaschi modern sto saver semover ed esser flexibels.

Treis parcellas, in possessur

Stefan e Claudia Cahenzli ein dapi onns vidlunder d’encurir sligiaziuns. Igl access per furniturs e transports ei buc ideals, ei mauncan parcadis pils vehichels dalla firma e dils emploiai. Buca mo ils plazs da baghegiar ein numnadamein daventai rars ella vischnaunca da Trin, mobein era la zona d’industria e mistregn. Tut ei quasi exaust. La zona cugl areal dallas firmas Casty e Gurtner a Trin Vitg ei occupada, medemamein las singulas parcellas a Trin Mulin agl ur dil stradun dall’Alpsu. En vesta a quels fatgs han Stefan e Claudia Cahenzli encuretg alternativas – ed anflau ina. Lur giavisch eis ei da restar el liug cumprovau. Amiez Trin Mulin, denter las vias Cava ed Isla, fuss ei denton buca stau sempel da sligiar il problem culla munconza da plaz per la scrinaria e lennaria. La planisaziun dil territori ei pretensiusa cun zonas definidas, cunfins, leschas, normas ed ordinaziuns.

Ella situaziun actuala profitescha il menaschi da ponderaziuns che Reto Cahenzli haveva fatg avon decennis. Il plan da quatier privat ei pusseivels grazia allas relaziuns da possess. Igl areal cumpigliau da rodund 2700 m2 s’auda alla famiglia Cahenzli. La surfatscha sereparta sin treis differentas parcellas: Sin ina ei la casa dalla famiglia, silla cunfinonta il luvratori, la tiarza ei in sulom da baghegiar. Stefan Cahenzli havess saviu vender quella ed augmentar la liquiditad dall’interpresa. Interessents havessen franc buca muncau. Uss ei quella surfatscha libra da rodund 830 m2 d’engrau per sligiar il problem da plaz. Ell’ei integrada el plan da quatier privat. Tenor ils documents ch’ein exponi dapresent en casa communala sa l’interpresa formar igl edifeci niev cun via d’access, parcadis ed ulteriura infrastructura che la scrinaria e lennaria drova. Grazia a quei plan da quatier privat sa l’interpresa sesviluppar. L’exposiziun publica dil plan da quatier privat cuoza aunc tochen ils 31 da mars.