Il slalom parallel da Spleia sveglia spiert cumpetitiv

DA STEFAN MÜHLEMANN

Igl è pir in’emna ch’il Club da skis Tambo Spleia, l’Uniùn da sport Tumpriv ed il Sci Club San Bernardino avevan envidà ad ina cumpetiziun en il sprint da biatlon e tecnica libra da passlung. E gia la sonda passada, uschè curt suenter la «Pschuuri» – il tschaiver da Spleia – ch’il spiert cumpetitiv è puspe stà sveglià.

Sco revantscha è vegnida purschida ina cursa en la tecnica alpina: Tant giasts da la regiun Viamala sco er commembers dals trais clubs da skis ch’èn sa participads per absolver la cursa dal slalom parallel sin la pista a val. La pista preparada perfetgamain – ell’era schelada da notg bella cumpacta – ed in’amiaivl’aura d’enviern han purschì idealas cundiziùns da cumpeter. Uschia èsi stads 86 skiunzas e skiunzs motivads ch’èn sa preparads la damaun da bun’ura per cumpeter. Ils pli giuvens cun set ons ed il skiunz experientà da 69 onns, Marco Albertini da San Bernardino, tuts che vulevan sa mesirar en il duel sin skis.

A l’entschatta hai tutgà da sa qualifitgar en la cursa a temp. Ils pli sperts 16 da mintga categoria èn vegnids admess per il tableau dal slalom parallel ed èn entrads en l’otgavel final.

Tgi che vuleva arrivar en il final aveva da decider mintga duel per sasez. Per dumagnar il duel final èsi perfin stà d’absolver duas cursas, mintgamai midond la pista, per betg chaschunar ina victoria casuala. Ils finalists han oramai gì d’absolver sis cursas cumpetitivas. Quai als è ì tgunsch perquai ch’els èn vegnids transportads a munt cun skibob-taxis, essend els ils campiuns dal di.

Cun l’applaus dals aspectaturs cuntents preschents sin la terrassa sulegliva da l’ustaria a la staziun a val han gì lieu las decisivas cursas finalas enfin a mezdi. L’onuraziun da las victuras e dals victurs ha gì lieu curt sissur, cun bleras ventiraivlas fatschas d’uffants. Els han exprimì tut quai ch’ils trais clubs da sport vulan cuntanscher cun lur engaschament communabel a favur dal sport: cuminanza, divertiment e plaschair per il sport da skis.

La cursa è vegnida sustegnida da Sport Grischun. La classificaziun dal slalom parallel da Spleia dals 9 da mars è da chattar sin sctambospluegen.ch/ranglisten