Victoria d’etappa per la muntogna

Dad Andreas Cadonau / ANR

Per plaschair da la Cuminanza d’interess da las vischnancas da concessiun e dals chantuns da muntogna ha il cussegl naziunal decidì cleramain da laschar ils tschains d’aua sin il livel actual da 110 francs per kilowatt. Uschia pon las vischnancas ed il chantun quintar cun las entradas actualas enfin l’onn 2024. «Grondius», uschia ha il president da la Cuminanza d’interess da las vischnancas da concessiun grischunas, Not Carl, valità la decisiun dal cussegl naziunal dal mardì passà da laschar il tschains d’aua sin il nivel actual da 110 francs per kilowatt prestaziun brutta. Betg sulet la decisiun che garantescha a las vischnancas da concessiun ed al chantun las entradas dals tschains d’aua enfin l’onn 2024 ha procurà per plaschair tar Carl, mabain era la decisiun sco tala. Il cussegl naziunal è suandà la proposta dal cussegl federal e da la maioritad da la cumissiun cun 133 vers 53 vuschs. «In fitg bun resultat, in resultat che fa speranza per l’avegnir.» Ina decisiun che Carl valitescha era sco signal cunter la lavur da lobbing da las ovras electricas ed a favur da la lavur da persvasiun che l’interessenza da las vischnancas da concessiun ha fatg tar parlamentarias e parlamentaris. Quella lavur da persvaziun da la cuminanza d’interess per exempel cun ina brev a mintga singul parlamentari valitescha Carl sco engaschi da laics envers la lavur professiunala da lobbing dals concerns d’energia. Ina lavur da lobbing che saja probablamein stada plitost negativa. Tant Not Carl sco il president da la Cuminanza da las vischnancas da concessiun sursilvanas, Richard Caduff, han quintà cun ina decisiun a favur dil tschains d’aua actual dal cussegl naziunal. Schebain che Carl sco Caduff han concedì che la politica saja magari incalculabla ed ina tscherta malsegirezza saja stada avant maun. La Conferenza da las regenzas dals chantuns alpins ha medemamain communitgà dad avair retschavì cun cuntentientscha la decisiun actuala dal cussegl naziunal. La conferenza scriva ch’il cussegl naziunal procuria per tschertezza giuridica cun prolungar il maximum dal tschains d’aua fin l’onn 2024 e cun suandar la decisiun dal cussegl dals chantuns.

La midada da sistem

En la debatta dad ier en il cussegl naziunal ha la cussegliera federala, Simonetta Sommaruga, punctuà che la soluziun proponida dal cussegl federal (e la fin finala acceptada dal cussegl naziunal) saja ina soluziun intermediara. Insacura stoppia il parlament sa fatschentar cun ina midada dal sistem. La cussegliera federala ha accentuà ch’i saja impurtant da nizzegiar il temp enfin l’onn 2024 da definir quella midada sistematica e formular co in model flexibel possia sa preschentar. Ella ha vinavant fatg attent als basegns legitims da vischnancas e chantuns e da las ovras. Chattar in equiliber tranter quels differents basegns saja l’incarica dals proxims tschintg onns, ha la scheffa dal departament per ambient, traffic, energia e communicaziun ditg. Pertschert che la midada da sistem vegn è er il president da la Cuminanza da las vischnauncas da concessiun grischunas. Sia pretensiun centrala è ina consequenta transparenza finanziala davart da las ovras. Inacceptabel ord optica da Carl da sulet duvrar il pretsch da current da la bursa d’electricitad per fixar il tschains d’aua. En quella direcziun è medemamain la Conferenza da las regenzas dals chantuns alpins s’exprimida. Ella pretenda da resguardar l’entira creaziun da valur da la branscha d’electricitad e scriva da pliras pussaivladads da gudogn da las ovras che sajan da resguardar enstagl da sa concentrar sulet sin in pretsch banal da la bursa. Ina midada da sistem na stoppia betg esser a disfavur da las vischnancas da concessiun, ha Carl accentuà. E per quella finamira veglia la cuminanza s’engaschar ils onns proxims.

Blera experienza

Ordvart positiv valitescha Carl l’engaschi da la Cuminanza da las vischnancas da concessiun grischunas ch’existia sulet dapi intgins paucs onns. Entaifer l’engaschi per il tschains d’aua saja reussì da mantunar blera savida e da tgirar contacts impurtants cun la politica. Per uschia sa confruntar cun la represchentanza da las ovras sin medem livel. Carl ha discurrì dad ina buna entelgientscha cun il chantun pertutgant ils tschains d’aua. Ha dentant punctuà la necessitad da las vischnancas da s’engaschar independentamain. Ils chantuns sco cunpossessurs da las ovras stoppian prender dapli resguard. «Nus dastgain intervegnir bler pli direct.»