Innovaziun cun tecnologias a favur da l’ambiaint

(anr/fa) L’ouvra secundara da las Ouvras Electricas d’Engiadina a Zernez survain ün indriz da distribuziun cun ün nouv sistem. Il gas in quel es 99 pertschient main privlus per l’ambiaint co il gas üsità. Grond travasch in marcurdi sün l’areal da las Ouvras Electricas d’Engiadina SA (OEE) a Zernez: Ün camiun ha manà ün indriz da distribuziun chi vain installà qua illa centrala secundara da las OEE. I’ls prossems duos ons renoveschan ils impiegats quist’ouvra cun seis indrizs da transfuormaziun e distribuziun. Ils cuosts s’amuntan a ses milliuns francs. «L’elemaint central da quist implant es apunta quist indriz chi’d es rivà hoz a Zernez», ha declerà il manader da proget Fabian Denoth. Sco ch’el ha agiunt es quai ün indriz fich innovativ.

Per las lingias d’ota tensiun 
da 110 kilovolts

«Pro quel as tratta d’ün indriz chi vain dovrà pella distribuziun da l’energia, pella lingias d’ota tensiun da 110 kilovolts», ha dit l’expert ed agiunt cha las OEE mettan quistas lingias tanter Bever e Scuol actualmaing suot terra. Da Pradella sper Scuol fin Zernez sun ils cabels fingià i’l terrain. La lingia da Zernez fin Bever vain missa suot terra dürant quist on. Quels indrizs da distribuziun vegnan isolats cun gas: «Fin uossa gnivna implits cul gas SF6 chi cuntegna suolper e fluorid», ha cuntinuà Denoth, «quist gas fess ün grond don al clima schi dess ün incap e sch’el sortiss da l’indriz.» Perquai han las OEE postà i’l chantun d’Argovia da General Electrics ün indriz da distribuziun cun ün gas bainquant main privlus: «Quel vain impli cun ün nouv gas. Cun quel as poja sbassar l’eventuala contaminaziun dal clima per bundant 99 pertschient», ha explichà il perit ed illustrà quai cun ün congual: «Cul nouv gas vain diminuida dürant la dürada da vita 
da l’indriz da var 40 ons l’emissiun per tant sco las emissiuns da 1920 autos in ün on.»

Ün’ouvra da piunier 
illa regiun dal PNS

Heinz Gross, il manader da progets e logistica e commember da la direcziun da las OEE, ha accentuà ch’indrizs da distribuziun sainza il gas nuschaivel SF6 sajan globalmaing ün’innovaziun. «Cun quista decisiun vöglian las OEE chi prodüan energia idraulica i’l territori dal Parc Naziunal Svizzer (PNS) metter ün signal internaziunal», ha’l dit, «per promouver uschea il svilup d’indrizs da distribuziun favuraivels al clima e per ün provedimaint d’energia perdürabel.» Denoth ha manzunà ils prossems pass: «Illas prosmas eivnas vain montà sco prüm l’indriz, in gün sun lura il transport e la montascha dal transformatur chi paisa bundant 56 tonnas, da maniera cha’l nouv indriz po gnir tut in funcziun dürant il mais lügl.» Las lingias d’ota tensiun da 110 kilovolts Pradella–Zernez e Zernez–Ova Spin vegnan lura missas suot tensiun. Las lingias Zernez–Bever 
e la lingia redundanta Zernez–Ova 
Spin vegnan in funcziun dürant il mais october.