Tgi che meditescha cul tgierp 
anfla confiert ella mistica (4)

Da Daniel Monn

Sontg’Antoni che porta igl affon Jesus sin bratsch ei in motiv fetg enconuschent. Sin maletgs ni sco statua eis el presents bunamein en mintga baselgia.

Tgei fa sontg’Antoni pomai cugl affon Jesus sin bratsch? Antonio – in grond teolog e bien predicatur – veva ina moda speciala da meditar. El mava mintgaton en baselgia, prendeva la statua da Jesus ord pursepen e teneva el sin bratsch, observava la fatscha, carsinava las vestas e tschintschava cun el.

Tier biars s’annunzian matei difficultads da capir co in grond teolog sco Antonio da Padua sa far zatgei aschia. Eis ei buc affonil d’interpretar cun tgierp ed olma szenas biblicas? S’entelli ch’in professer da teologia sefagess oz ridiculs da meditar aschia. Quei fatg muossa co la teologia ufficiala ha piars il senn dalla mistica. La pratica da sontg’Antoni era pli baul derasada lunsch entuorn. Da Nadal per exempel vegn documentau il suandont usit:

Ils cartents – seradunai en baselgia – contan canzuns da tgina. Il bambin vegn prius ord la tgina ed igl augsegner tonscha el als cartents. Mintgin spetga tochen ch’el ni ella astga prender il bambin sin bratsch. Tgi carsina la vesta. Tgi betscha il frunt. Tgi fa ninna nanna cun el. Magari croda in larmin d’ina dunna giuvna. Ei cuoza entginas canzuns tochen ch’igl affon vegn remess ella tgina sper igl altar.

Quella metoda dad interpretar cun tgierp ed olma szenas biblicas dat ei era oz. Ins tschontscha dil bibliodrama.

Tgi che meditescha a moda concreta culs senns dil tgierp anfla il confiert ella mistica.

PS. La teopoesia sco tutta autra poesia – ha da far cun nies entir esser, pia il carnal ed il spirtal. Tgi ch’integrescha sia sensualitad ella spiritualitad anfla ina veta cumplenida e libra da scadina organisaziun.