«Viver actualmein denter 
comica e tragedia»

(anr/gc) Arno Camenisch, il lunsch entuorn enconuschent scribent sursilvan, da Tavanasa, ha prelegiu sco emprem autur el «niev Forum» claustral. Quel stat sut l’egida dad avat Vigeli Monn ch’ha fatg al scribent, liricher ed autur da scenas per la tribuna in beinvegni cordial per romontsch. Sco Arno Camenisch ha schau percorscher eis el puspei inagada vegnius bugen en Surselva. Culs onns – el ha cumpleniu avon in onn ils 40 – sesentien ins adina pli attratgs dalla patria d’origin. Quei plascher d’esser denter ils cumpatriots han ins era sentiu l’entira sera ora. Sia prelecziun ha fascinau ed ei lu era vegnida quittada cun in ferm applaus.

«Der letzte Schnee» – in dialog original e scurril

Avon biebein in onn ei l’ovra «Der letzte Schnee», da Camenisch, cumparida. Ses cudischs – en tut 10 tochen ussa – ein vegni translatai en 20 lungatgs e prelecziuns orda quels han menau igl autur lunsch pil mund entuorn. E prest adina e dapertut hagi el saviu constatar che Romontschs erien denter il publicum.

«Der letzte Schnee» ei in dialog denter ils protagonists Paul e Georg. Els ein emploiai attempai dil runal, originals aschi differents. Ferton che Georg ei la ruasseivladad sezza ei Paul buca da puder far quescher. El fabulescha ton davart quei che svanescha, quei ch’el less frenar e metter tut en uorden. Tut selai udir en in mix da romontsch, dialect grischun e svizzer. Ei vegn tschintschau e commentau bia dil vargau e present el mund local e lontan. Quei sefa en in lungatg plein maletgs, cun tips scurrils e precisamein cun la tematica: svanir dad ina Val ella midada dil mund. Davostier ei il runal cun sia canera regulara in simbol per quei che cuora el temps actual ora el mund.

Ovra ludada e distinguida

En sia introducziun ha avat Vigeli allegau che l’ovra «Der letzte Schnee» hagi raccoltau bia laud e distincziuns. Quei constat, sch’ins legia las recensiuns surlunder ton ella pressa sco al radio ed alla televisiun – e quei lunsch sur ils cunfins svizzers ora. Zaconts resuns seigien citai:

En il Club litterar dar SRF ha Elke Heidenreich, ina reputada litterata tudestga, taxau «Der letzte Schnee» sco «in’ovra meisterila». – El medem format televisiv ha il presidcnt dalla pcd svizra, Gerhard Pfister, definiu l’ovra sco «in giuvel». Tenor il «Tages-Anzeiger» «tucca Arno Camenisch perfetgamein igl actual sentiment da viver denter comica e tragedia». – En «20 Minuten» ei da leger: «Sias historias spir maletgs ord in pign vitg grischun, enrihida da neologissems scharmants, ein ina lectura fetg deletgeivla.» Il SWR considerescha l’ovra da Camenisch sco «in conglomerat fascinont dil present e vargau». Per concluder la schelta da reacziuns e resuns sin l’ovra da Camenisch seigi aunc citau «Tele Basel»: «La nova ovra dad Arno Camenisch, ‘Der letzte Schnee’, ch’ei pér in’jamna sin cruna da cudischs, secatta gia sin plaz 1 dalla gliesta dils bestsellers.»

Camenisch ei era vegnius distinguius cun varga in tozzel premis da litteratura sco il Friedrich-Hölderlin-Preis (Tiaratudestga), Premi svizzer da litteratura, Premi Schiller da ZKB, il Premi litterar da Berna, il Premi da promoziun dil Grischun, il Premi Term Bel, la Plema ed il Premi da cultura da Raiffeisen Svizra.