Cuntinuaziun ell’Engiadina

Da Hans Huonder / anr

Igl emprem Festival da la chanzun rumantscha a Trun ei vegnius visitaus stedi. Ils biars arranschaments ein stai occupai cumpleinamein. Il proxim festival ei 2022 ell’Engiadina. Il cau dall’organisaziun, Clau Scherrer, tila ina bilanza positiva dils treis dis: «Jeu havess buc ughegiau da semiar enzatgei aschia. Igl ei stau grondius e cun bia glieud da buna luna ed interessada.» Quintau ensemen tuts arranschaments sedattan frequenzas da rodund 2000. Da venderdis sera entochen dumengia suentermiezdi ei vegniu fatg musica, cantau e discussiunau el center communal amiez il vitg da Trun. «Cun quei festival havein nus vuliu mussar la gronda ed interessanta varietad musicala dalla Surselva. En treis onns duei l’Engiadina saver far quei», di Scherrer. Curdin Lansel vegn ad esser leu al tgamun dall’organisaziun. Cun quei festival ei la musica vegnida promovida, mo parallelmein era il lungatg romontsch. «La cultura viva dalla simbiosa denter lungatg e musica. Avon ch’ins mondi ora el mund duess ins enconuscher las atgnas ragischs», puntuescha Scherrer ch’ei loschs dalla gronda prestaziun digl entir comite d’organisaziun. In dils arranschaments principals ei la concurrenza da cumposiziuns stada.

commentari e paginas 2, 3 e 4