Egn vieadi turbulaint a l’aventura cugls kiwis

Tgeara ligidra, tgear ligider

Nus levan ear survagnir egn’impressiùn da la «tearza» insla da la Nova Zelandia, da Steward Island near Rakiura, agl lungatg digls Maoris. Leza satgata digl tut agl sid. Mena ple vagnainsa ad amblidar la traversada sen la bartga. Igl noss tgapitani veva managieu a l’antscheata digl vieadi ca la traversada tras la Mar Tasmanica vigni a easser criua, las undas segian 2½–3 m òltas. Avànt ca partir vainsa perquegl procuro satgets da turnantar, spitgànd alura ampo narvusas la sort inevitabla, tamànd las undas vagnaintas. Igl catamaran nus pareva betga ple grànd c’egn cros d’egna nusch sen la mar infinita. El sadulzava a sasbassava an egn taner ad eara badaint da tut igls màns, a la proxima unda c’eara gea par s’avaschinar! Riànd sbaratavan nus mintg’eada iglieadas plagn schnavur cur ca nus vasevan atras la faneastra c’egna gigantica unda saduvalava nà d’egn màn near l’oter. Dantànt, nus vagn samusso statevlas – degnas par navigar parfegn cun l’Alinghi – ad igls noss magùns ân tanieu petg a las sbirladas. Oters turists pitevan sgarschevlameing, dafartànt c’egn tal vieadi turbulaint pareva «normal» pigls indigens: Els bavevan cumadevlameing lur schufs a la mesa canorta!

Rivadas a Steward Island vainsa fatg igl tur da tres gis, igl Rakiura Track, ca magna atras gràndius gòlds oriunds, passànd magnificas spleias da mar. Cur ca nus vagn antschiet igl tur pluvev’igl; cur ca nus eassan turnadas dev’igl sulegl. La savunda staziùn da pernotar e ancunaschainta par puder observar – sch’ign â ampo furtuna – kiwis, quels utscheals c’en activs da notg ad en betga ple capavels da sgular. Nus vagn ampruvo la nossa furtuna, eassan sapustadas a las diesch da la sera agl ur d’egna senda, las glischs cotschnas ainta màn, tarlànd tge ca samuainti an la stgiraglia. Igls kiwis vess ign d’udir bagn, cur c’els giran atras igl gòld… a nus vagn gieu furtuna! Gea var 20 minutas ple tard scruschev’igl datier da nus agl tgagliom a cunegnea e cumparieu egn tal utschi sen la senda. Da spira agitaziùn â’gl cuzo egn dètg mumaint antocan ca nus vevan anvido la glisch cotschna. Quella disturba betg igls kiwis. Nus vagn strusch savieu capir, me var tres meters davànt nus steva egn balteztgas a veritavel kiwi. El â savieult, e zapagieu aint pigl gòld ad e sto svanieu an la stgiraglia. Nus eassan ànc gitg stadas a là, sperànd: Tgi sa sch’el turna? Mo tutanegna vainsa udieu egn sgarschevel sbrigem an la bostgaglia, igl tunava da mazamaint – mo igl e me sto la vusch da dus kiwis batarlànts. Nus stevan a spitgeavan. La finala essan vagnidas recumpensadas: Egn kiwi e puspe vagnieu a trotànd sen la senda ad e passo loschameing cun cresta dulzada sper nus vei. Alura e vagnieu egn savund, egn ànc ple grànd, directameing anviers nus par safarmar gest davànt nus. El steva mur eri – el pareva d’ancorscher c’igl segi qua anzatgi. Kiwis vezan betga bagn, ân dantànt egn nas fegn. La finala â’l sascurlo, â mess tort igl tgieu ad e prest scarpitschieu sur igls pes da la Jolanda avànt da cuntinuar la sia spassageada par lùng da la senda a sparir an la stgiradetgna. Nus earan profundameing impressiunadas a beadas: Tge evenimaint! Qua stevan nus tut naïvas anzanouas agl ur d’egna senda a vagn propi pudieu observar veritavels kiwis!

Par Jolanda e quegl sto igl sieus savund vieadi a la Nova Zelandia. Igls 1990 veva ella luvro durànt egna staschùn sco surmestra da skis a qua. Natiralmeing ca nus vagn stuieu visitar igl antschies da skis spegl Lake Ohau. Egna tessa veia natirala magna an var 30 minutas an que antschies c’â egn runal da var 800 m lungheztga. Gea da rivar agl liac e egn’aventura par saseza. Parquegl e’gl scret a l’antscheata da la veia privata: «Vus passaz la veia sen agen restg»!

Nus vagn ear visito l’anteriura patrùna da la Jolanda. Jo â dantànt 70 ons ad e egn’instructura da skis pensiunada d’egn on annà. Ella eara egna da las pionieras digl sport da skis an la Nova Zelandia. Ella veva ear instruieu a Flem noua ca Jolanda veva fatg ancunaschientscha cun ella lez’eada. Nus vagn passanto legras uras tier Jo a sieus um Butch. Jo â parfegn sfugnieu nanavànt igl pulover c’ella purtava alura a Flem ad igl amprem pulover da skis c’ella purtava a Lake Ohau, egn cotschen rosa a cler-blau!

Igl nus e ieu vess da bandunar l’insla digl sid da la Nova Zelandia, mo nus lessan ànc survagnir egn’impressiùn da l’insla digl nord durànt igl mains da marz. Parquegl eassan nus sco sen spegnas!Erica Nicca