Incendi en casa da pliras habitaziuns

(anr/hh) La notg sin gliendisdis ha ei barschau en ina casa da pliras habitaziuns a Sedrun. Ils quater avdonts han saviu bandunar il baghetg ad uras. La polizia cantunala ei vegnida alarmada allas 02.27 ch’ei seigi rut ora in incendi sil balcun dall’alzada sut il tetg d’ina casa da pliras famiglias a Sedrun. Las quater persunas avdontas ella casa han saviu bandunar quella senza blessuras ed han survegniu suttetg privat. Prevedentamein ei la squadra d’ambulanza da Mustér vegnida clamada. Allas 57 forzas d’engaschament dils Pumpiers Sursassiala eis ei reussiu da stizzar spert il giug. Suenter che quei ei stau reussiu ei la situaziun vegnida controllada d’ina guardia. Sco quei che la polizia cantunala scriva en ina communicaziun als mieds da masa eran la habitaziun sisum e treis ulteriuras habitaziuns da vacanzas buc occupadas il mument digl incendi. La polizia cantunala vegn a far las examinaziuns per eruir ils motivs dil barschament.