Scolaziun da pilots 
da dronas per 
salvar chavriels

Voluntaris, per gronda part chatschaders, emprendan da sgular dronas per uschia pudair chattar chavrielins avant ch’ils purs segan lur prads. Igl è ina situaziun crudaivla: Ansiels da chavriels èn sin in prà e vegnan blessads u schizunt mazzads entras maschinas da segar. Ils purs na pon betg adina vesair ils chavrielins en il pastg aut u en chaglias. Uschia emprovan ins uss cun l’agid da dronas, equipadas cun cameras termicas, da chattar chavrielins sin prads avant ch’i vegn segà. Tar il pausadi Viamala a Tusaun èn laics da l’entir chantun (per gronda part chatschaders) vegnids scolads co ch’i saja da sgular dronas. Il chantun metta numnadamain a disposiziun las dronas, a manar ils projects vegnan dentant las secziuns da chatscha regiunalas en collavuraziun cun ils guardiaselvaschina. Las dronas dal curs a Tusaun eran dentant anc betg equipadas cun las cameras termicas. Quellas dovri per alura chattar chavrielins. En emprima lingia gievi uss tar quest curs simplamain da trenar il sgular las dronas. La secziun da chatscha Tasna en Engiadina Bassa aveva lantschà il project da tschertgar chavrielins cun agid da dronas l’onn passà. Quest onn vegn quella metoda er introducida en las regiuns Signuradi, Partenz, Tumleastga, Val Schons e Surselva. Per salvar ansiels da chavriels ha il chantun cumprà 20 dronas. Quella investiziun fa en mintga cas senn – ins fa ina lavur cuminaivla en favur dals chavrielins. Il salvament cun dronas vegn a cumplettar las metodas existentas per proteger ils ansiels da chavriels, sco per exempel spaventar els giu da prads cun tschorventar.

Datiers da la chapella St. Maria Magadalena a Dusch sur Pasqual è la fin d’emna vegnì lavurà. Quai en favur da la biodiversitad. Il territori da protecziun Dusch è numnadamain in prà sitg nua ch’ins vul evitar ch’in guaud crescha. Tut en tut ha la zona da protecziun da la Pro Natura a Dusch ina surfatscha da bunamain 5000 m2. Uschia han 11 voluntarias e voluntaris sut la batgetta da la Pro Natura stgarpà or chaglias e chaglioms sin il prà sitg per dar spazi a spezias periclitadas, per exempel a l’anemona da muntogna. Quella flura è sin la glista da flurs perclitadas. Tut quai che vegn stgarpà or resta en la zona da protecziun. Ils voluntaris furman cun quest lain rumì mantuns – en emprima lingia per dar refugis e spazis vitals a reptils.

Per la regenza datti avunda fluctuaziun en il cussegl grond. Uschia respunda ella sin ina moziun dal deputà da la pbd Oliver Hohl. Durant las elecziuns regularas vegnia il cussegl grond mintgamai occupà per radund in quart cun novs commembers. Ultra da quai saja il pensum da las partidas da motivar giuvens politichers. En sia moziun aveva il deputà Oliver Hohl argumentà che politichers giuvens n’hajan quasi nagina schanza tar elecziuns dal cussegl grond da gudagnar sezs encunter deputads che sesan gia ditg en il parlament. Perquai vuleva Hohl dar l’incumbensa a la regenza da far ina proposta adattada per limitar il temp d’uffizi per deputadas e deputads. Var 50 commembers dal cussegl grond avevan sustegnì la moziun.

Il mountainbiker Nino Schurter ha cumenzà cun success il Cape Epic en l’Africa dal sid. Ensemen cun Lars Forster ha el gudagnà l’emprima etappa suenter ch’els èn gia stads ils sperts dal prolog. Suenter duas dad otg etappas maina il duo svizzer cun Schurter e Forster il classament – cun in avantatg da radund trais minutas e mesa sin il Tudestg Manuel Fumic che parta ensemen cun il Brasilian Henrique Avancini. Il Cape Epic, che vegn era numnà il Tour de France dal mountainbike, vala sco la pli dira cursa d’etappas en il sport da mountainbike.