Prest tots on detg EA e prest tots speran

(pb) Igls 123 votants preschaints alla radunanza communala digl cumegn da Surses da glindesde seira passada on accepto cun gronda pluralitad las propostas dalla suprastanza per en hotel resp. ena residenza da vacanzas a Savognin/Viols. A chels dus projects cun ena somma totala da ca. 61 miu. investiziuns conceda igl cumegn da Surses ena somma da promoziun à fonds perdu da 3,050 miu. Nignas surpresas ple tar la radunanza communala. Siva dalla seira d’infurmaziun digls 10 da december 2018 sur digls dus projects ins cunascheva ple u manc igls fatgs. Surses vot a tot prietsch en svilup turistic. Siva tants fiascos cun projects per hotels e surbiageidas dad abitaziuns ins era generalmaintg en po frustro. Ma per tots era tuttegna cler tgi igl avigneir so eir angal ainten ena direcziun. Chegl è er nia documento antras ena ferma participaziun. Ed uscheia è igl resultat per conceder a dus differents investors la vendita da taragn per ena contribuziun da promoziun à fonds perdu sto fitg cler. Ins ò strousch gia objecziuns ed alla finala sustignia las propostas dalla suprastanza cun 116:3 resp. 114:2 vouschs.

Chegl siva ena sagonda preschentaziun digls projects siva digl december 2018 antras igls responsabels.

En hotel da quatter steilas

Las decisiuns dalla radunanza communala èn stadas d’ena vart an connex cun la construcziun dad en hotel a Viols. Se sur la sponda da vart dretga digl Lai Barnagn. Tgi chel project, cuntrari digls projects precedents, tanghescha betg igl territori digl Lai Barnagn è an mintga cass er sto en plus per l’acceptanza generala.

Da vart dallas zonas ò la radunanza communala gia da piglier nignas decisiuns essend tgi igl taragn era gio ainten la zona d’hotels B. La parcella è an possess digl cumegn da Surses ed ò ena surfatscha antiera da 18 438 m2. Per igl hotel tgi varo igl nom Hotel Viols vign la surfatscha sotparcellada cun ena grondezza da 5286 m2. Chesta parcella venda igl cumegn alla societad Panorama Development SA tgi fò l’investiziun per la construcziun digl hotel. Igl prietsch da vendita per chel taragn è 1,043 miu. e corresponda agl prietsch da stema vertent per chel taragn.

Ena sagonda tgossa tgi igl suveran da Surses ò decidia chella seira è ena contribuziun unica à fonds perdu dad 1,4 miu. Chegl è en sustign da promoziun tenor las directivas communalas tgi ins vot dar per la construcziun d’hotels ed alloschamaints cun letgs administros. Dall’infurmaziun tar chest project igl december 2018 ins veva menziuno da leir dar igl taragn per en prietsch simbolic dad en franc per meter quadrat. Ossa ins è nia tar en’otra conclusiun, numnadamaintg da sustigneir tals projects cun ena somma pauschala tgi monta 3%–5% digls costs d’investiziun. Cotras ins vot tractar tot igls projects madem.

Tar la societad tgi compra igl taragn e fò la construcziun digl taragn, la Panorama Development SA, sa tractigl dad ena societad cun sedia a Coira.

Architect per igl project è Urs Nüesch da Tinizong. Aint igl sies project èn previas total 108 tgombras cun 240 letgs, ena partiziun da wellness e fitness ed en’ustareia publica cun 150–160 plazs. Igls costs d’investiziun èn calculos cun 28 miu.

Egn digls gronds problems digls projects digls davos onns tgi èn betg nias realisos è sto igl menaschi digl hotel. Da cattar en manader adatto. La societad ò catto chel cun la «Mövenpick Hotels & Resorts» en’interpresa tgi è activa internaziunalmaintg ed appartigna siva digl aton passo alla gruppa d’hotels Accor.

Igl Hotel Viols fiss igl amprem da chella cadagna aint igl Grischun.

En’otra societad 
per igl resort

La sagonda part digl project a Viols è la construcziun dad en resort da vacanzas. Cò è pero vedlonder otra gliout cun en’otra societad. Chegl è la RESalpina ScRL tgi ò la sedia a Breil. Igl taragn tgi ins dovra per chesta surbiageida ò ena surfatscha da 9389 m2. Sen chella parcella vignan construeidas ena tgesa per igl manaschi da travagl ed ena partiziun da wellness e dasperas tschintg tgesas ple u manc identicas cun total ca. 80 abitaziuns.

La vendita digl taragn alla societad vign messa a chint cun 1,854 miu.

Correspondent agl sustign per igl hotel paia igl cumegn da Surses er cò ena cuntribuziun da promoziun dad 1,65 miu. u maximal 5% dalla somma da construcziun. Las investiziuns cò èn calculadas cun 33 miu.

Dalla parcella antiera resta anc ena surfatscha da 3763 m2. Sen chella parcella fò igl cumegn da Surses igl equipamaint e tschertas installaziuns per tots dus projects. Pinavant vignan er erigias 150 parcadis tgi stattan schibagn a disposziun agl hotel scu er agl resort da vacanzas. Igls parcadis vignan dos a tschains.

An treis otras tractandas ò gia da neir mido igl contract d’adiever cun igl Club da ballape Surses an en dretg da biagier per survagneir la contribuziun da 100 000 francs sustign digl cantun. Pinavant è nia decidia da cumprar a Beiva igl anteriour bietg dalla posta cun igl plaz da farmada per 400 000 francs. Ed alloura ò gia da neir adattada la lescha communala da natiralisaziun alla madema lescha cantunala e federala revideida.