Viafier retica vul dapli trens la saira sin la lingia d’Alvra

Durant il favrer ha la Viafier retica laschà cursar il venderdi e la sonda saira mintgamai in tren supplementar da San Murezzan a Tusaun ed enavos, cun arrivada a las 23.45 a Samedan. Sco quai che la Viafier retica scriva sin dumonda dad RTR hajan dentant mo paucs nizzegià ils trens supplementars. Vers la fin da la fasa da test sajan las frequenzas dentant s’auzadas in pau. La direcziun da la Viafier retica ha avant curt decidì da prender si ils dus trens supplementars en l’offerta dal proxim urari. Quai vul dir ch’ils trens da la saira tard pudessan gia cun la midada dal proxim urari vegnir integrads fix en l’urari. Il giavisch da la Viafier retica è da laschar cursar ils trens da la saira durant l’entir onn e betg mo la saira. Cun rinforzar las mesiras da communicaziun quinta la Viafier retica da pudair augmentar il dumber da passagiers en l’avegnir. L’introducziun dals trens da la saira dependa anc dal chantun e da la confederaziun. Quels ston lubir ils trens da la saira ed examinar sch’igl è pussaivel da finanziar la purschida supplementara.