Guido Jörg banduna l’anr

Da Hans Huonder / anr

Cun la fin da quest onn seretila Guido Jörg (61) sco meinafatschenta dall’Agentura da novitads rumantscha (anr) e va en pensiun anticipada. Dapi 22 onns meina el l’anr en pensum parzial. Guido Jörg ei entraus en survetsch dall’agentura il 1997, igl emprem onn da menaschi da quella. Igl emprem cun incumbensa d’exequir differents mandats, pli tard sco meinafatschenta. Ch’el seretila ussa ha in motiv principal. «L’entschatta 2020 vegn lantschau il menaschi dalla nova organisaziun da medias romontscha «Fundaziun Medias Rumantschas» (FMR) e per quei motiv eis ei uss il punct ideal da terminar la funcziun sco meinafatschenta dall’anr», di Jörg ch’habitescha a Domat. Avon ch’entrar en survetsch dall’anr eis el staus engaschaus nov onns tiel «Bündner Tagblatt», plirs onns sco cauredactur e menader dalla casa editura.

Temps plein tensiun

«Duront sia historia da passa 20 onns ei l’anr vegnida signada da temps turbulents, mo era da fasas plein tensiun. Jeu seregordel denter auter digl onn 1997. Lu ei vegniu menau discussiuns tgi che duei redeger ed edir La Quotidiana. Mo lu era avon rodund diesch onns cura che l’anr ha stuiu surprender parts dalla redacziun da LQ», seregorda Jörg. Cun sia vasta purschida ei l’anr daventada da muntada existenziala per ils mieds da massa stampai ella Romontschia: «Senza las prestaziuns dall’agentura savess La Quotidiana buca cumparer ella fuorma actuala.» Dapi che l’anr ha surpriu plirs collaboraturs dalla redacziun da La Quotidiana procura ella pil material che garantescha in’ediziun quotidiana. «Quei ei denton pusseivel mo grazia al grond engaschament digl entir team da redacziun dall’anr», constatescha Jörg. Senza il sustegn dall’anr fussen denton era ils dus ulteriurs products da print romontschs «Posta Ladina» e «Pagina da Surmeir» periclitai. «Per quei motiv ein ils survetschs dall’agentura da novitads ina dallas pli impurtontas ed efficientas mesiras per mantener e promover il lungatg romontsch», constatescha Jörg. Per ina dallas grondas sfidas futuras taxescha il meinafatschenta partent il consum d’informaziuns da medias digitalas per la nov’organisaziun da medias Fundaziun Medias Rumantschas. Sper il contact quotidian cun redacturas e redacturs ella centrala a Cuera ed ora ellas regiuns ha Jörg tgirau ina relaziun professiunala fetg stretga cul cauredactur da La Quotidiana, Martin Cabalzar, mo lu era culla responsabla per las finanzas dall’agentura, Cecilia Manetsch.

Diesch plazzas da lavur

L’anr ei vegnida fundada il zercladur 1996. Cul menaschi operativ ei la redacziun partida il schaner 1997 parallelmein cun La Quotidiana. La finamira dall’anr ei da sustener ils mieds da massa romontschs, en special las gasettas. Di per di furnescha ella contribuziuns a scret e fotografias a La Quotidiana, la «Pagina da Surmeir», la «Posta Ladina» ed als mieds da massa electronics romontschs. Las contribuziuns ein screttas els idioms ni en rumantsch grischun. Ils idioms ve-gnan nezegiai per communicaziuns localas e regiunalas, il rumantsch grischun per contribuziuns sur ils cunfins dallas regiuns ora. L’anr occupa diesch collaboraturas e collaboraturs cun in volumen da lavur dad 810 pertschien. Leutier ve-gnan collaboraturas e collaboraturs libers en Surselva, Surmeir, Val Schons, Engiadina ed ella Bassa.