«Da smetter cun la Higa 
è nagin tema»

DA GION NUTEGN STGIER / ANR

Sonda ha la pli gronda exposiziun industriala e commerziala dal Grischun, la Higa avert sias portas. Tranter ils 200 expositurs sa chattan er 60 da noss chantun. L’exposiziun saja per l’economia da gronda valur, è vegnì ditg pliras giadas. Per la segunda giada ha la Higa, l’exposiziun da commerzi ed industria avert sias portas en il mais da mars. Fin il 2017 ha quella exposiziun adina gì lieu en il mais da matg. Cunzunt sin giavisch dals expositurs han ils organisaturs da la Higa midà la data per la Higa, dal matg sin a la fin da mars. Quella midada saja cumplettamain sa cumprovada, ha ditg Marco Engel, il mainagestiun da l’Expo Cuira. Avert sias portas ha la Higa sonda a las 13.00, l’avantmezdi è la prominenza da Cuira, da la politica chantunala e naziunala s’entupada per assister a la preavertura, cun blers pleds, in brunch, bler vin alv ed il motto esser preschent e sa mussar.

Expositurs fidaivels

Cun 200 expositurs schea il dumber da quels en il rom usità, ha ditg Engel, el ch’è ussa gia 20 onns en vair senn la figura principala da la Higa. Il mainagestiun da l’Expo Cuira ha lura er ditg ch’ils organisaturs dastgan esser cuntents cun avair expositurs fidaivels. Uschè saja quest on la firma Triacca Vins per la 30avla giada da la partida a la Higa, ha menziunà Engel. Dals 200 expositurs derivan dal reminent 60 dal Grischun. Il dumber dals expositurs da Cuira quel saja danovamain sa reducì, ha ditg il schef da la Higa. Ina da las raschuns saja ch’ils manaschis hajan simplamain betg la capacitad per esser preschents a l’exposiziun e dasperas avair avert mintga di lur travagl en la citad.

En ina situaziun ventiraivla

En ses pled da bavegna ha Engel cunzunt fatg attent a las exposiziuns da commerzi ed industria svizras ch’èn gia istorgia. El ha en spzeial menziunà la Muba a Basilea, la Züspa a Turitg ed il Comptoir Suisse a Losanna, trais grondas exposiziuns che han per adina serrà lur portas. Engel ha ditg che exposiziuns commerzialas ed industrialas tutgan en nagin cas al passà. Quai conferman per exempel la Bea a Berna, l’Olma a Son Gagl e la Luga a Lucerna che attiran millis e millis persunas. Tar ina da quellas exposiziuns cun in grond interess tutga lura er la Higa, ha ditg Engel cun plaschair. Ultra da quai ha el punctuà: «Da smetter cun la Higa è nagin tema». Ils organisaturs da quella sajan bain en ina situaziun ventiraivla cun avair in public fidà e cun avair blers onns ils medems expositurs, ha menziunà il mainagestiun da la Higa. Engel ha er manegìa che dad avrir mintga di la Higa a las 13.00 saja stada ina buna decisiun, saja il visitader da quella propi in da la saira.

Tgirar ils buns contacts

Per il Grischun per l’economia en general ed er per nossa societad saja la Higa da fitg gronda impurtanza e valur, ha ditg il president da la regenza, cusseglier guvernativ Jon Domenic Parolini. L’exposiziun saja ina plattafurma ideala per l’economia e er per l’agricutura. Ella saja er qua per tgirar ils contacts tranter manaschis e clients, ella saja ina vaira rait per il commerzi e l’industria e lura er in lieu per s’entupar e per sa divertir. Ultra da quai saja la Higa ina occurrenza per mussar la gronda multifariadad da noss products. L’exposiziun saja per in pau dapli che be maschinas da lavar e vin, ha ditg il cusseglier guvernativ cun in rir.