Igl è vegnì engulà dapli

DA GION NUTEGN STGIER / ANR

Il dumber dals delicts è s’augmentà en noss chantun per 433 cas. La pli gronda part èn malfatgs cunter il cudesch penal svizzer. Il dumber dals enguladitschs da daners è il 2018 stà pli aut che anc l’onn avant. Ier ha la polizia chantunala dal Grischun preschentà la statistica dals cas criminals en noss chantun. Fatg quai per la davosa giada ha Gianfranco Albertini, il schef da la polizia criminala dal Grischun. Cun la nova restructuraziun dal cader da la polizia chantunala mida el en’inautra partiziun. Il dumber total dals delicts è s’augmentà levamain en noss chantun, e tuttina ha Albertini fatg ina bilantscha positiva. La raschun saja che dapi l’onn 2009, cura che la polizia criminala da noss chantun haja fatg per l’emprima giada la statistica criminala, saja il dumber dals malafatgs cunter il cudesch penal svizzer sa reducì.

Da lez temp eran quai anc stads 8156 cas e nov onns pli tard 6808 cas, ha ditg Albertini.

En Svizra damain enguladitschs 
ed en il Grischun daplis

L’onn passà han las polizias chantunalas da l’entira Svizra registrà 112 000 enguladitschs. Cumpareglià cun l’onn 2017 èn quai 7,9% damain enguladitschs, guardà naziunal. Dal reminent il 2012 era il dumber dals enguladitschs en Svizra anc tar vers 219 000 cas. En il Grischun èn quels s’augmentads il 2018 da total 3978 cas sin da nov 4237 malfatgs. La pli gronda part da quels malfatgs èn enguladitschs da facultad cun 1992 cas. L’onn precedent eran quai anc 1861 cas. Dals total 6808 cas cunter il cudesch penal svizzer ha la polizia chantunala savì sclerir per stgars 43%.

Augment tar las 
blessuras corporalas levas

La gronda part dals delicts da violenza èn smanatschas, blessuras corporalas levas, acts da violenza, constricziuns, baruffas e violenza/smanatschas cunter funcziunarias e funcziunaris. Tar las blessuras corporalas levas hai dà in augment da 111 sin 128 cas, tar las constricziuns in augment da 38 sin 48 cas. En il rom da relaziuns sumegliantas ad ina famiglia è regredida la violenza a chasa da 238 a 214 cas, 56% da quels (onn precedent 57,5%) pertutgan relaziuns actualas da pèrs respectivmain da partenaris. En Svizra ed er en il Grischun è il dumber dals malfatgs sur internet, saja quai engions, pornografia, squitsch e fraud s’augmentà, e quai fitg. Cun il schenumnà «Cibercrime» saja da quintar en ils proxims onns anc bler dapli, ha ditg Albertini.

Cuira e la Val dal Rain

Ils pli blers delicts èn vegnids annunziads a la polizia chantunala a Cuira cun in total da 1936 cas. A la chapitala grischuna suanda la Val dal Rain cun 1624 cas cunter il cudesch penal svizzer, suandada da Tavau cun ina cifra da 1049 cas. En la Surselva schea quel dumber tar 525 cas ed en l’Engiadina tar 971 cas. Quai che pertutga ils culpants e lur derivanza naziunala èn quai 751 Svizzers e 685 culpants derivan da l’exteriur. Areguard ils cas da meds narcotics e drogas è Cuira a la testa cun 409 cas, avant Zernez cun 70 cas ed Albula/Alvra cun 56 cas.