Chadaina da fortuna per unfrendas da guerra

(cp) Gievgia, ils 28 da mars 2019, rimna la Chadaina da Fortuna ensemen cun la SRG SSR daners per las unfrendas da guerra en il Jemen. Ina da las centralas da collecta da telefon vegn endrizzada tar Radiotelevisiun Svizra Rumantscha (RTR) a Cuira. Là pon vegnir fatgas donaziuns via il numer da telefon gratuit 0800 87 07 07 a partir da las 7.00 fin las 23.00.

Durant il di naziunal da solidaritad per las unfrendas da guerra en il Jemen vegnan voluntarias e voluntaris a prender encunter donaziuns en las unitads d’interpresa da la SRG SSR a Turitg, Cuira, Lugano e Genevra. Ina da las centralas da la collecta da telefon vegn endrizzada tar RTR a Cuira. Là èn voluntaris e prominenza sco p.ex. Marcus Caduff, Ladina Heimgartner, Peter Peyer, Anita Capaul, Martin Candinas, Clau Scherrer, Nevin Galmarini euv. tuttadi al telefon. Cun las donaziun sustegna la Chadaina da Fortuna sias ovras d’agid partenarias che gidan la populaziun avant lieu. Las donaziuns vegnan duvradas en emprima lingia per ils basegns urgents sco mangiativas ed il provediment medicinal.

Durant il di naziunal da collecta pon vegnir annunziadas ad RTR donaziuns a partir da la damaun a las 7.00 enfin 23.00 via il numer da telefon gratuit 0800 87 07 07. Donaziuns pon ins era far online via www.glueckskette.ch da tut temp.