Pendiculara nova vegn en funcziun

Da Hans Huonder / anr

Ils 6 d’avrel 2019 vegn la nova pendiculara da Sedrun sil Cuolm da Vi messa en funcziun per la publicitad. Igl Uffeci federal per traffic ha dau la concessiun persuenter. Avon struschamein in onn ha la construcziun dalla nova pendiculara dalla Val Tujetsch el territori da skis da Mustér entschiet. La finamira oriunda era da terminar las lavurs sin la stagiun d’unviern 2018/19. Per differents motivs ei quei denton buca reussiu. Tuttina han las lavurs saviu vegnir finidas aschia ch’igl ei stau pusseivel da far las davosas preparativas quest unviern ed aschia da suttametter igl indrez per examinaziun agl uffeci federal. Sco quei che las Pendicularas Mustér SA scrivan en ina communicaziun als mieds da massa, ei la lubientscha ufficiala pil menaschi ussa avon maun. Cheutras sa la pendiculara vegnir messa en funcziun per la publicitad, vul dir per viadis da Sedrun sil Cuolm da Vi. Naven dils 6 d’avrel 2019 duei quei esser il cass.

Colligiaziun dils territoris

«Cun l’avertura dalla pendiculara da Sedrun sil Cuolm da Vi sedat ina colligiaziun directa naven dalla staziun da viafier a Sedrun el territori da skis da Mustér. Jeu selegrel fetg che quella colligiaziun dils territoris da skis Andermatt-Sedrun-Mustér ha saviu vegnir terminada aunc quest unviern», di il president dil cussegl d’administraziun dallas Pendicularas Mustér SA, Marcus Weber. Quei ei in secund grond pass el rom dil niev territori da skis che sestenda d’Andermatt ento-chen Mustér, suenter che la colligiaziun d’Andermatt e Sedrun ei succedida il december vargau. Sco segn per la buna collaboraziun dall’Arena da skis Andermatt-Sedrun e las Pendicularas Mustér SA che han era instradau communablamein la nova societad Andermatt-Sedrun-Mustér Marketing SA, retscheivan ils possessurs dils abonnaments digl onn dall’Arena da skis Andermatt-Sedrun la carta dil di da Mustér cun in rabat da 50 per-tschien. Sco quei che las Pendicularas Mustér SA scrivan en ina communicaziun als mieds da massa, vala il medem pils possessurs dallas cartas stagiunalas dallas Pendicularas Mustér SA per l’auter territori. Per l’avertura dalla pendiculara nova porschan las Pendicularas Mustér SA era prezis reduci per cartas dil di e cartas dalla fin d’jamna. La pendiculara nova da Sedrun sil Cuolm da Vi vegn en funcziun ils 6, 7, 13 e 14 d’avrel, sco era dils 19 entochen ils 22 d’avrel 2019. Plinavon la stagiun da stad 2019.

Investau 130 milliuns francs

La planisaziun e la construcziun dalla pendiculara nova ha custau rodund 15 milliuns francs. Sper la staziun da muntogna sil Cuolm da Vi ei previu leu era in’ustria da panorama. La construcziun da quella ei previda igl onn 2020. Medemamein vegn erigiu leusi in niev runal. La colligiaziun da Sedrun el territori da skis da Mustér ei ina part digl entir project d’engrondaziun dil territori da skis Andermatt-Sedrun-Mustér. Tut en tut ei vegniu investau en quel rodund 130 milliuns francs. La pendiculara da Sedrun sil Cuolm da Vi duei denton buca mo esser in access el territori da skis igl unviern, mobein era ina nova ed attractiva purschida per la stad. Dil Cuolm da Vi anora duei vegnir purschiu pusseivladads da viandar, ir cun velo e reiver.