Igls pi pacs cass da donn siva dalla fundaziun

pb. Tenor igl rapport annual e scu preschento ier seira alla radunanza generala a Casti ò la sieranza da bies-tga Alvra gia igl 2018 igl migler onn siva da sia fundaziun igl 2001. Chegl vot deir cun igls pi pac cass da donn, numnadamaintg 75. Tuttegna ins ò scretg en minus da 24 572 francs aint igl chint da travagl. La sieranza da biestga è chella instituziun digls pours tgi impidescha sperditas pi grondas agl cass tgi animals segl travagl puril, sen pastgira u sen l’alp, pero er antras malsognas von a mal. Chegl tgi la sieranza indemnisescha an en cass da donn è forsa betg chella valeta tgi igl animal vess sen la fiera. I sa tracta dad ena indemnisaziun pauschala tgi livgia igl donn. Pi bod vevan las sieranzas da biestga sezzas stimadours tgi gevan dad uigl tar uigl e valutavan igls animals dus gedas ad onn. Tenor la stema niva alloura en animal tgi geva a mal indemniso cun ena procentuala da 70% u 80%. Tenor la stema paevan igls pours er las premias.

Siva tgi las singulas sieranzas da bies-tga tgi eran ainten mintga vischnanca èn neidas fundadas tar la sieranza da biestga Alvra, è igl sistem mido. Igl pour indi-tgescha sez quant grond tgi la somma da sieranza duess esser. È chella pi ota stò igl pour paer daple premias, è pero pi bagn cuvert. È la somma pi bassa costa la sieranza betg tant, ma igl regress è an cass da donn er pi bass.

En onn sainza evenimaints 
spezials

Per David Sigron da Vaz è igl 2018 sto igl amprem onn scu nov president dalla sieranza da biestga Alvra. El è nia eligia avant en onn scu successour da Gion-Franzestg Schaniel tgi ò surpiglia igl presidi dall’Uniun purila Alvra. Magnafatschenta dalla sieranza è siva digl 2013 Sonja Christen da Vasarauls.

Schi vurdagn la grafica dasperas vasainsa igl svilup digls cass da donn. All’antschatta era igl domber pi ot cun anfignen oz igl record igl 2003 cun 159 cass da donn. Chegl è digl reminent sto chel onn cun la stad dallas temperaturas da record. La stad passada è er stada fitg tgoda e sitga. Damais dattigl nigna corelaziun directa tranter l’ora dalla stad – chel taimp tgi la biestga è ad alp – ed igls cass da donn. La biestga è exponeida sur onn a divers prievels e betg angal chels treis meis sen l’alp. Chegl demossa cleramaintg tgi igl 2018 èn stos angal set accidents sen l’alp e tot igls oters da chels 43 èn capitos a tgesa. Tgi dat daple accidents a tgesa tgi sen l’alp ò da far cun stads relativamaintg sitgas e sainza neiv igls davos onns. Ed alloura dattigl ade-gna daples accident ainten las stallas libras.

Schi lagn cuntinuar cun la grafica, alloura vasainsa tgi igls onns 2007 anfignen 2010 èn er anc stos pulit ots cun igls cass da donn per alloura sa sbassar sen en nivel considerabel pi bass e restar lò e zont anc sa sbassar anavant. Igl onn 2003 èn stos 159 cass ed igl onn passo damais 75. Chegl èn gist damais passa 50%. En muteiv per la reducziun è igls travagls e las anvernadas tgi èn sa redutgeidas.

Madem blers travagls

La sieranza da biestga cu las sias statisticas dat er en’invista ainten igl svilup digls travagls. Vot deir aint igl domber. Gl’è nign misteri tgi chels sa redutgeschan dad onn tar onn. Vala pero betg per igl 2018. Lò ègl do dus sorteidas cun aveir do se igl travagl, ena antrada, treis travagls èn nias surdos ainfra la famiglia e treis on catto ordvart ena schliaziun da successiun adattada. Igl onn da travagl 2019 ò antschet cun 91 commembers cun 2161. Igl 2001 eran chegl anc 178 cun 3323 anvernadas.

Igls 32 accidents on custo alla sieranza netto 48 981francs. Cass da malsogna tgi la sieranza ò gia da surpiglier en stos 43 e chels gravegian igl chint annual cun 74 176 francs. Igls cass da donn sa repartan sen 38 travagls.

Tiers las 2161 anvernadas da biestga grossa èn sieradas an 24,82 anvernadas nursas, 11,29 anvernadas tgoras da latg, 11,9 tgoras e 21,33 tschuis.

Sierar pon igls pours lour animals cun ena varianta pi bassa tgi sa nomna Abula-Basis ed ena varianta pi tgera Albula-Plus. 91% digls animals èn sieros tar la Albula-Plus. La somma totala dallas premias per igl 2018 è stada125 188 francs.

Las antradas totalas digl onn da gestiun 2018 montan 94 176 francs. Da l’otra vart stattan las expensas cun 118 748 francs. I sa resulta la sperdita gio menziunada da 24 572 francs.

Schi giagn alloura tar la bilantscha constatainsa tgi la sieranza da biestga Alvra stat bagn. Las reservas legalas tgi ins ò dad aveir fissan radon 300 000 francs. Igl total activas per igls 31 da december 2018 è sto 881 756 francs.

Scu tgi Christen ò detg, ins vegia an vista a chellas bunas cefras concedia agls commembers per lour fidevladad ena reducziun dallas premias.