Credits per la canalisaziun da Clavaniev, Latis e Pignola

(cp) En sia seduta dils 29 da mars 2019 ha il cussegl da vischnaunca, sut il tgamun d’ Armin Berther, tractau suandonts projects da canalisaziun: la separaziun d’aua Clavaniev (credit brut 165 000 francs), la nova canalisaziun Latis–casa da scola (credit net 165 000 francs) e la nova canalisaziun zona da mistregn Pignola 2 (credit net 143 000 francs). Cun vusch unanima conceda il cussegl ils credits necessaris per la realisaziun dils treis projects da canalisaziun. En ina secunda lecziun ha il cussegl tractau la revisiun parziala dalla lescha d’agricultura ed il regulativ da taxas tier la lescha. Suenter intensiva discussiun e far entginas midadas redacziunalas ha il cussegl approbau cun 13 encunter ina vusch la revisiun parziala dalla lescha d’agricultura ed il regulativ da taxas tier la lescha. Plinavon ha il cussegl decidiu da suttametter la revisiun dalla lescha d’agricultura sco era il regulativ da taxas tier la lescha d’agricultura al referendum facultativ tenor art. 21, lit. b dalla constituziun communala.

Project dil Center da 
sport e cultura

Prevedentamein era previu da suttametter a caschun dalla seduta dil cussegl da vischnaunca dils 29 da mars 2019 il messadi sco la damonda da credit per il project sanaziun ed adattaziun dil Center da Sport e Cultura (CSC). Il project cun la calculaziun dils cuosts ei preparaus. Il mument ei la cumissin da baghegiar dil CSC vid la concepziun turistica. La coordinaziun cun la destinaziun turistica Mustér/Sedrun, cun nos novs gronds investurs ella sparta turistica, cun la regiun Surselva e cun igl uffeci per economia e turissem dil cantun Grischun drova sco ei semuossa aunc empau temps. Nossa finamira ei da posiziunar il Center da sport e cultura en la regiun Surselva sco caussa singulara che radiescha lunsch sur las scheinas da nossa vischnaunca. La suprastonza communala ei vidlunder da surluvrar il plan d’investiziuns e finanzas communal cun actualisar e priorisar tuttas incaricas communalas, e quei en stre-tga collaboraziun cun igl Uffeci da vischnauncas dil Grischun. La suprastonza communala e la cumissiun da baghegiar dil CSC lavuran cun grond anim e plascher per presentar al cussegl da vischnaunca e populaziun da Mustér in valent project cun in saun fundament finanzial. Sco gia menziunau pretenda la preparaziun dalla fatschenta aunc empau temps. Ord quella raschun ha la suprastonza communala decidiu d’abolir ils termins fixai en caussa damonda da credit al cussegl, sera d’informaziun e votaziun dil pievel.