Cussegl consultativ

continuaziun da la pagina 2

Malgrad questas cundiziuns da lavur fitg attractivas e bleras annunzias per il nov post, era da las persunas menziunadas sura, n’ha il cussegl da fundaziun betg pudì far in’elecziun cuntentaivla. Tenor infurmaziuns or da fontaunas fidadas n’avevan nagin(a)s da las aspirantas e dals aspirants da las qualitads sura menziunadas a moda cumulada. Gugent ni navidis ha il cussegl da fundaziun la finala stuì da decider da clamar ina persunalitad nundispitaivla e cun ina acceptanza absoluta en l’entira Rumantschia en quest post. La parsura da «Medias Rumantschas» è fitg satisfatga da pudair preschentar cun Riet Nutegn Cabiallavetta (Breil/Brail) ina persunalitad extraordinaria che dispona en gronda abundonza da tut las qualificaziuns pretendidas. Suenter studis intensivs a las universitads da Turitg, Paris, Berlin e New York ha el gist acquistà il doctorat cun il predicat summa cum laude per sia dissertaziun intitulada «L’identitad dals Rumantschs e lur schientscha interrumantscha ord optica linguistica, culturala, sociolinguistica, economica, sociala, politica e religiusa». Il nov schefredactur general haja ina gronda acceptanza en tut las regiuns rumantschas damai che ses bab saja Sursilvan, sia mamma Engiadinaisa, ses tat Surmiran, ses padrin Jauer e sia madretscha da la Val Schons. El saja in bun chantadur, sunia bain clavazin, dettia dentant era golf e fetschia passlung. Cabialaveta saja ultra da quai ina persuna giuvna, sportiva e fitg attractiva.

L’entir project vegn persequità, examinà ed accumpagnà d’in cussegl consultativ che consista dals partenaris da las medias existentas e dad «eminenzas grischas» da la Rumantschia. Ladina Heimgartner è respunsabla per il ressort cooperaziun, Martina Gammeter per il ressort qualitad, Silvio Lebrument per il ressort management ed organisaziun, Gian Michael (anr) ensemen cun Gian Sonder (URS) per il ressort sensibilisaziun da la populaziun ed Johannes Flury per il resort lingua e cultura. En quest resort vegn el sustegnì dals professers universitars emeritads Iso Camartin, Clà Riatsch, Alexi Decurtins e dals novs Rico Valär (Turitg) e Matthias Grünert (Friburg). La Lia Rumantscha metta a disposiziun il correctorat ed il Dicziunari Rumantsch Grischun las fotos. Pro Idioms è represchentada cun Domenic Toutsch (Engiadina) e Francestg Friberg (Surselva), il rumantsch grischun cun Bernard Cahomas, la pressa catolica cun Giusep Capaul (Vatican) e la cretta refurmada cun la decana Cornelia Camichel Bromeis. L’anteriur directur da RTR Mariano Tschuor represchenta la claustra da Mariastein e la conferenza dals uvestgs svizzers.

Act festiv da partenza per las
 «Medias Rumantschas»

L’act festiv che ha liug oz punct a las 11.11.11 sin la Cuort episcopala a Cuira e che vegn emess direct live sin RTR a Cuira vegn introducì dal bainvegni da la presidenta dal cussegl d’administraziun Widmer- Schlumpf. Il nov schefredactur general Riet Nutegn Cabialaveta vegn a tegniar in discurs programatic davart sias visiuns perl l’avegnir da las «Medias Rumantschas» ed il parsura da la LR Flury e ses secretari general Gabriel èn responsabels per il program accumpignant. A sa preschentar vegn il Chor viril Surses, il rappunz sursilvan Ivo Orlik ed ils ladins Peder e Flurin e la Gruppa da saut da la Val Müstair.

Assister a la ceremonia vegn era l’uvestg rumantsch Vitus Huonder e ses successur in spe Martin Grichting che ha sco anteriur plevant da Surcuolm in’affinitad speciala per ils Rumantschs. Probabel vegn gist era profità da la publicità per proclamar cun questa chaschun l’elecziun dal nov uvestg da Cuira che vegn ordinà ed instituì da Pastgas en la catedrala da Cuira. Envidà a la festivitad da las «Medias Rumantschas» è l’entir pievel rumantsch da Tschamut fin Martina e da Schons fin Val Müstair.