«La Quotidiana» sco gasetta gratuita

Da Balzar Camartin

En rom dal project «Medias Rumantschas» èsi reussì da reunir tant radio e televisiun (RTR) sco era tut las gasettas rumantschas existentas (LQ, PL e PdS) sut in nov tetg strategic ed operativ. Quai lubescha tranter auter d’edir inavant «La Quotidiana» e da derasar ella – print e digital – gratuitamain en tut las chasadas rumantschas. A dispusiziun stat in budget annual da 30 milliuns. Quest pass innovativ, gea spectacular per las medias rumantschas vegn festivà oz glindesdi, ils 1-4-2019, cun in act festiv che cumenza punct a las 11.11.11 sin la Curt episcopala a Cuira. Fontaunas fidadas pretendan ch’ins dettia cun questa chaschun era gist enconuschent il num dal nov uestg da Cuira che vegn instituì da Pastgas en ses nov uffizi en la catedrala da Cuira.

Cun la planisaziun da l’act festiv han ins incaricà il renumà architect da Vrin Gion A. Caminada, cun l’inscenaziun l’intendant d’Origen Giovanni Netzer e cun la gastronomia Andreas Caminada. Suenter il salid da bainvegni entras il parsura da la Lia Rumantscha Johannes Flury vegn ses secretari general Martin Gabriel a surpigliar la moderaziun dal program. La nova parsura dal cussegl da fundaziun, ant. cussegliera federala Eveline Widmer-Schlumpf vegn a preschentar en in pled magistral ils pilasters prinzipals dal project «Medias Rumantschas» che saja in’ovra da piunier ed haja caracter da model per la cooperaziun era per tut las autras medias publicas e privatas da l’entira Svizra. Il noveligì schefredactur general da las «Medias Rumantschas», Riet Nutegn Cabialaveta vegn a tegnair in pled programatic davart sias visiuns per las medias en general e per las medias rumantschas en spezial. La directura da RTR Ladina Heimgartner ed ils editurs da las gasettas existentas Silvio Lebrument (Somedia), Martina Gammeter («Posta Ladina») Gian Sonder («Pagina da Surmeir») e Gian Michael (anr)vegnan suenter ch’els han suttascret da buna fei la «charta da buna voluntad» uss era suttascriver il contract da fusiun tranter RTR (radio, televisiun, online) ed ils editurs privats, surdond en il medem mument la responsabladad redacziunala a la nova organisaziun «Medias Rumantschas». Che questa visiun daventa la finala usche spert realitad è d’engraziar a l’iniziativa e speditivitad da la LR che ha surpiglià avant dus onns il timun dal project e d’attribuir cunzunt era al cussegliader extern Markus Spillmann che ha menà ils protagonists sin il plaun da la realitad. Detagls brisants da questa nova cooperaziun che munta in term istoric per la Rumantschia pon ins leger sin pagina 2 en La Quotidiana dad oz.

Pagina 2 e 3