An 90 minutas 
anturn igl mund

DAD OSKAR HUGENTOBLER

Igl conzert anual da la Sozietad da musica d’Andeer digls 29 a 30 da marz an la sala polivalenta d’Andeer â mano igl auditori sen egn vieadi musical anturn igl mund. Ear da la partida e stada la furmaziùn da giuvenils da la Scola da musica Viamala. Igl conzert da la Sozietad da musica d’Andeer «Egn vieadi musical da 90 minutas anturn igl mund cun partenza a rivada ad Andeer» â do la caschùn ad audituras ad auditurs da giuder numerusas cumposiziùns par musica d’instrumaints da flo digl cunturn manevel a da ple dalientsch. Urs Arpagaus â dirigieu cun bravura instrumentalists a pecussionists da la Sozietad da musica d’Andeer.

Carol Eberhard â capieu da preschantar igls singuls tocs cun comentaris divertevels. Igl marsch digl zoo svizer, igl vieadi agl Tirol digl sid near igl sgol «Pour un flirt» a Paris en stos temas. La plidadra â capieu stupentameing da culiear quels temas cugls liacs d’origin digls tocs near cugls cumponists da tals.

Igl vendergis sera e’gl sto la furmaziùn digls giuvenils da la Scola da musica Viamala c’â do egna producziùn speziala. La «Juniorband» vean dirigida da Stephan Liver. Las anunztgas digls singuls tocs en vagnidas fatgas da las scularas ad igls sculars sezs. Els ân betga me divertieu bagn igl auditori cun lur musica, mobagn i ân ear incanto cun spustar magiels, splatschànd exactameing agl tact, egna moda a maniera poc usitada d’acumpagnear musica.

Igl vieadi musical cun «l’Air Force One» (igl aviùn digl president american) â mano agl Stadis Unieus a davent da là e’gl ieu cun melodeias russas directameing a Moscau.

Puspe turnos an Europa, âni fatg resunar igl ancunaschaint toc «Rocking Elise» ca Beethoven veva scret da sias uras par la sia marusa. A la fegn ân las musicàntas ad igls musicànts prieu cumgieu cun «Going Home» (Nànd a tgea) da Mark Knopfler.

Igl aplaus standieu digl publicum â procuro, c’igls musizists ân ànc gieu da sunar dus tocs tempramaintus sco suplemaints. La sonda e’l igl program musical vagnieu variieu cun la producziùn «Comedy» digl cabaretist Fabian Rütsche. Suainter igl program da la Sozietad da musica d’Andeer â suno sei la Kapelle 7027 a divertieu igls la cumpagneia da feasta.