Daplü spaisas causa las impraisas da fabrica

DA FLURIN ANDRY / ANR

Da la Conferenza dals presidents fan part ils ses capos cumünals da la Regiun Engiadina Bassa Val Müstair. A chaschun da lur seguonda sezzüda hana trattà eir quint annual 2018. A la fin da marz s’han chattats ils commembers da la Conferenza dals presidents da la Regiun Engiadina Bassa Val Müstair (EBVM) per lur seguonda sezzüda da quist on. Insembel cun Rico Kienz chi maina la gestiun da la regiun s’han ils capos Walter Zegg da Samignun, Victor Peer da Valsot, Christian Fanzun da Scuol, Emil Müller da Zernez e Rico Lamprecht dal Cumün da Val Müstair occupats da differents temas. Ün es stat il quint da la regiun.

Quint serra cun ün surplü d’expensas

Il quint annual 2018 da la Regiun EBVM serra pro sortidas da 4,32 milliuns francs ed entradas da 2,47 milliuns francs cun ün surplü d’expensas da s-chars 1,86 milliuns francs. «Quel es crodà oura in congual cun l’on avant per 2,5 pertschient o per s-chars 45 000 francs plü ot», ha declerà Kienz, «il surplü da spaisas pro l’administraziun per l’import da 50 000 francs resulta dals cuosts giuridics chi ha dat in connex cullas scuvertas da la Cumco (tud. Weko).» Pro’ls uffizis curatella professiunala, scussiun e fallimaint e stadi civil ha la Regiun EBVM ragiunt ün resultat da 70 000 francs meglder co l’on avant, «quai impustüt causa chi’d es reuschi da generar daplüssas entradas». Pro’l svilup regiunal resulta in congual cun l’on avant ün surplü d’expensas da 
schars 65 000 francs. Quel deriva da la contribuziun a favur da l’EBexpo da 55 000 francs e da contribuziuns per differents progets nouvs.

Sustegn pel chastè da Tarasp 
eir da la regiun

Il cumün da Scuol s’ha declerà pront da pajar fin la fin da l’on 2030 ün import annual da 200 000 francs per cha’l chastè da Tarasp resta inavant accessibel a la generalità. «In lur cunvegna cul proprietari Not Vital hana fixà cha’l cumün da Scuol possa provar da chattar oters partenaris da la regiun chi güdan a finanziar fin a maximalmaing 70 000 francs da quist import», ha explichà Kienz. Uossa ha la Regiun EBVM decis da pajar al cumün da Scuol minch’on 35 000 francs per quel adöver. Il capo da Scuol Fanzun improvarà da survgnir il medem import eir amo dal Chantun. Lura vess il cumün da pajar be plü 130 000 francs l’on sco cuntraprestaziun a l’access avert a tuot ils interessats i’l chastè da Tarasp. La conferenza dals presidents ha deliberà unanimamaing il quint annual ed eir il rapport da revisiun 2018.

Consultaziun davart la GrFlex

Ils commembers da la Conferenza dals presidents han trattà eir la consultaziun davart la flexibilisaziun da las finanzas (GrFlex). Els han deliberà la consulta-
ziun in chosa. «Ils presidents da la Regiun salüdan bainschi l’intent dal Chantun dad evitar cha’ls cumüns hajan da surtuor prestaziuns chantunalas», ha dit il manader da gestiun da la regiun Kienz, «causa chi han stuvü constatar cha quist intent nu vain per gronda part na resguardà sun els cunter il GrFlex sco cha quel as preschainta actualmaing.» D’incuort ha comunichà il manader da la curatella professiunala, Gregor Finsterwald, ch’el giaja a la fin d’avuost antecipadamaing in pensiun. In seis post ha la Conferenza dals presidents da la Regiun EBVM elet unanimaing ad Iwan Gisler, fin quai seis substitut.