Ils meglders juniors svizzers da hockey a Scuol

(anr/bcs) L’ultima fin d’eivna s’han chattadas las megldras squadras da hockey da juniors da la Svizra a Scuol per cumbatter pel titel dal champiun svizzer. Las squadras dals Juniors Elita A e quels da l‘Elita novizs s’han qualifichadas pro‘ls mez-finals. Davo la premiera da la Finalissima da l’on passà chi ha gnü grond success sun ils megl-ders juniors svizzers da hockey tuornats a Scuol per cumbatter pel titel da champiun svizzer. In quatter gös da la sonda e dumengia han las quatter squadras as masüradas sün ot livel da hockey. I’l final da la categoria Juniors Elite A (1999 e plü giuvens) ha battü Genève Futur Hockey lur adversari Lausanne 4 Clubs. Pro l’elita dals novizs (2002 e plü giuvens) es stat il vendschader l’EV Zug chi ha guadagnà cunter ils SCL Young Tigers. Ils spectatuors han giodü gös d’ota intensita e da fich buna qualità da las megldras squadras da juniors da la Svizra. Las squadras chi han giovà ils finals s’han stuvü as qualifichar per pudair tour part a la Finalissima a Scuol. Als organisaders cun a la testa il president da l’Associaziun grischuna da hockey ed anteriur president dal Club da Hockey Engiadina, Marco Ritzmann cun var 70 agüdonts esa gratià da cumprovar danouvamaing ch’els sun abels da realisar maestranzas da hockey da buna qualità. Diversas squadras da la plü ota liga dal hockey svizzer han organisà chomps da trenamaint a Scuol e vegnan adüna darcheu causa las bunas relaziuns chi ve-gnan sportas illa halla da glatsch a Gurlaina. Fingià in favrer ha gnü lö ün inscunter da la squadra naziunala svizra da hockey U16 cun trais gös cunter la Slovakia.

Scuol es üna bun’adressa 
per evenimaints da hockey

Scuol es fingià divers ons fich activ illa sparta hockey ed il Club da Hockey Engiadina s’ha s-chaffi ün bun nom i’l hockey da seguonda liga. La halla da glatsch a Gurlaina ha investi blera munaida per spordscher, sper ils oters sports d’inviern, ün’ulteriura pussibiltà per cumplettar la buna sporta da la regiun. Ils respunsabels dal Club da Hockey Engiadina e da la halla da glatsch han pisserà i’ls ultims ons per üna sporta pel sport da hockey chi vain stimada per chomps da trenamaint e per maestranzas. Sper la cuorsa da la Coppa mundiala da Snowboard chi ha gnü lö al principi da marz es la Finalissima dals juniors da hockey ün’occurrenza d’inviern importanta per la destinaziun turistica TESSVM.

Na d’invlidar l’aspet turistic

Ils respunsabels han pudü salüdar sper var 100 giovaders, trenaders ed accumpagnants eir a blers giasts uffizials. «Per no es quist evenimaint eir ün arrandschamaint per preschantar i’l segmaint da hockey ad ün grond public. No vain gnü a la Finalissima quist on in quels duos dis 1300 fans, glieud da cader, funcziunaris, sponsuors e glieud chi ha pled in chapitel pro’l sport da hockey svizzer», ha dit Ritzmann. Las 420 plazzas illa halla d’eiran tuottas occupadas. Per promouver l’attractività dals gös pels spectatuors vaivan ils organisatuors eir procurà per ün program accumpagnant ed in mincha posa dals inscunters gös attractivs. Tuots quels chi lessan savair daplü davart ils inscunters ed ils resultats precis as pon orientar sülla pagina d’internet www.finalissima-scuol.ch.