In fretg selvadi 
plein vitaminas

(anr/sr) La spina da rein (Sanddorn) ei in fretg selvadi che crescha pil solit leu, nua ch’ei crescha pauc ni nuot auter, per exempel sin spundas suleglivas e schetgas ni alla riva dil Rein el sablun. Margrit ed Adolf Hartmann da Furna en Tumliasca tschercan dapi quater decennis quels fretgs che fan parada en in oransch intensiv e cuntegnan oravontut bia vitamina C ed era carotin. Equipai cun vestgadira da schurmetg encunter caglias e spinas tschercan els las ruclas custeivlas e sco gidonters pil transport surveschan lur dus asens. Igl onn vargau han els rimnau varga tschun tonnas da quellas «bumbas da vitaminas» e la gronda part da quellas coclas han ei anflau en Lumnezia. Ordlunder fan ils Hartmanns – tenor empustaziuns dalla clientella – dafertontier sirup ni suc original frestg. La gronda part dils products da Sanbro venda il pèr direct, ina pintga part en stizuns sco per exempel el shop sper l’autostrada a Tusaun. La jamna vargada han els visitau la Destillaria Candinas a Surrein e referiu leu davart la raccolta dalla spina da rein, ils avantatgs da quei fretg selvadi ed ils products da Sanbro.

pagina 3