Cuira cumenza 
a remplazzar las plantas donnegiadas

L’october passà ha la naiv donnegià var 40% da las plantas a Cuira. Uss remplazza la citad 200 da quellas. Per plantar e tgirar las 200 plantas novas stop-pian ins far quint cun var 4000 uras lavur, di Urs Tischhauser, manader da l’orticultura da la citad da Cuira. Quest onn plantan els anc var 40 plantas, ils rest succedia ils proxims pèr onns. Per remplazzar tuttas aifer in onn n’hajan els betg avunda glieud. Las emprimas plantas han ils ortulans plantà perlung da la Ringstrasse. La gronda part da quellas è da la sort «platana». Quai è ina planta che crescha atgnamain plitost en il sid. Sorts indigenas na chatt’ins dentant strusch per lung las vias. Dals 28 sin ils 29 d’october 2018 avevi tut en ina giada navì. La gronda part da las plantas purtava anc lur feglia. La naiv è uschia restada sin las plantas ed ha chaschunà in grond pais. Enturn 1400 da las 3600 plantas èn vegnidas donnegiadas. Il donn total munta tenor in rapport da l’orticultura da Cuira a var 600 000 francs.

Engiadina San Murezzan suste-gna ina candidatura da l’Engiadin’Ota per il campiunadi mundial da freestyle il 2025. L’organisaziun turistica Engiadina San Murezzan, saja pronta da dar ina contribuziun finanziala e d’accumpagnar l’occurenza dal campiunadi mundial da freestyle il 2025 tar la communicaziun. Er las pendicularas renconuschan la gronda muntada da l’event. Fin il prim da matg 2020 pretenda la FIS ina conferma a scrit da vulair star a disposiziun per organisar quest campiunadi mundial. Sper l’Engadina sco organisatur local sto era la federaziun svizra da skis sustegnair la candidatura.