Ils pli vegls texts romontschs

(anr/abc) Vendergis-sera ei ina vernissascha speciala a Glion. El marcau nua ch’il predicant Steffan Gabriel ha operau all’entschatta il 17avel tschentaner presenta in da ses successurs in project scientific. Il plevon e historiograf Jan-Andrea Bernhard ha perscrutau fontaunas che han gidau a formar il lungatg scret romontsch. Ils predicants reformai ein suandai il catechissem che ha giu en mira d’avischinar il pievel alla ductrina, e quei cun texts el lungatg dil pievel. Pia buca latin e buca tudestg, mobein romontsch. Ellas valladas grischunas discurevan ins adina romontsch. Denton mo paucs savevan leger e scriver da gliez temps, tuts documents vegnevan screts els lungatgs dils «signurs»: en latin e tudestg. Era a Glion tschintschavan ins da gliez temps spirontamein romontsch. Cu Steffan Gabriel ei arrivaus en sia pleiv nova el marcauet, ha el constatau ch’ei muncava stampats e cudischs per l’instrucziun dil pievel. Pia ei el vegnius activs ed ha entschiet a translatar e scriver. Leger quels ozildi ei buca caussa da mintgin. Per bia buca tuts manuscrets ein edi e publicai. Senza ina ediziun critica ei quei gnanc pusseivel. Bernhard ei sededicaus a tals documents e manuscrets ils davos diesch onns. Denter 2008 e 2018 ha el realisau il project d’edir texts vegls cul tetel «Ilg Vêr Sulaz da pievel giuvan». Sut il patrunadi digl Archiv da stadi dil Grischun ha el aviert las fontaunas per ulteriuras fuormas da perscrutaziun. Damaun vendergis, ils 5 d’avrel, finescha il project cun in’ura festiva. Il program entscheiva cun in plaid da Sandro Decurtins, vicearchivari dil stadi. Lu suondan dus referats da Bernhard e Matthias Grünert, professer da romontsch all’universitad da Friburg. Clau Maissen embellescha la vernissascha musicalmein.

Tuts interessai alla historia e cultura ein envidai da separticipar alla vernissascha, quella entscheiva allas 18.15 ell’ustria Lukmanier, Via S. Clau Sura a Glion.