Trun/Rabius ni Schlarigna?

Da Gabriel Derungs / anr

Suenter las liungas jamnas d’unviern senza giugs da campiunadi, cun bia trenaments en halla, cun ils camps da trenament el sid, cun plirs giugs amicabels, va ei questa fin d’jamna puspei per puncts, era en 4. ligia. Suenter ils giugs d’atun ella gruppa 1 para la situaziun clara: Duas squadras ein sedistanziadas dallas ulteriuras aschia ch’ei vegn il pli probabel tiel duel denter Trun/Rabius e Schlarigna quei che pertucca la damonda tgei equipa che vegn promovida alla fin dalla stagiun 18/19 dalla 4. ella 3. ligia. Momentan ei Schlarigna alla testa cun 25 puncts ord nov giugs, cun treis puncts avantatg sin Trun/Rabius. Mo la secunda da Schluein/Glion ha aunc in lev contact cun quellas duas squadras cun in retard da siat puncts sil capogruppa Schlarigna.

Sil quart plaz sesanfla l’equipa dall’Uniun sportiva Danis-Tavanasa cun 14 puncts. Era alla fin dalla tabella vegn ei ad ir la finfinala denter duas squadras, tgeinina che sto morder el meil asch dalla relegaziun en 5. ligia. Sil dieschavel e davos plaz sesanfla la squadra da Panaduz cun in punct ed ella zona da prighel cun treis puncts ranghescha il team da Laax actualmein sil secund davos rang.

Trun/Rabius: 
Co vinavon?

Mario Solèr ei en tut priu cuntents culla preparaziun e menziunescha sco punct culminont il camp da trenament a Tenero, nua che si’equipa ha saviu trenar sut cundiziuns idealas. En differents giugs da preparaziun ha’l saviu experimentar per anflar las posizuns adattadas per ses giugadurs. El deplorescha che siu caposettagols Patrizio Decurtins ei seblessaus el davos giug amicabel e croda forsa ora per in temps. Satisfatgs eis el denton che dus ferms giugadurs da Trun ein puspei returnai: Ivo Albin e Gion Andrea Nay, che han dau pliras sesiuns cull’emprema da Schluein/Glion e s’udevan leu tiel tschep dalla squadra, ein danovamein anavos e vegnan segir ad esser in grond rinforzament per Trun/Rabius. Deplorablamein ha il giuven talentau giugadur Pietro Jacomet stuiu terminar sia carriera da ballapei. Pliras grevas blessuras han adina puspei frenau el e la resca ei ussa daventada memia gronda. La sanadad ei pli impurtonta. Il fidau goli dils davos onns Sandro Tomaschett ha da sbatter cun problems musculars e vegn a star a disposiziun mo en cass da basegns. El vegn remplazzaus en gol entras il giuven Andri Nay.

La damonda principala ei ussa: Vulan ils giugadurs da Trun/Rabius insumma far il pass en 3. ligia? Las regurdientschas dalla sesiun 14/15 nua ch’ei ha dau 16 terradas en 22 giugs en 3. ligia fan aunc adina empau mal il venter a plirs giugadurs ed els lessan evitar da far quellas experientschas ina secunda gada. Pli bugen dar en 4. ligia e saver festivar leu biaras victorias.

Ni fuss l’equipa ussa pli madira da dar ina ligia pli aulta che lezza ga? Quella tematica vegn bein aunc a procurar per enqual discussiun denter trenaders, suprastonza e giugadurs dil CB Trun/Rabius. En tut cass fan els il pusseivel da star vinavon davon viaden ella rangaziun. Lu mirar co ei vesa ora ella fasa finala dil campiunadi.

Schlarigna: Finamira 
ei la promoziun

Las premissas per la partenza ella runda da primavera ein tenor trenader Marco Jola tut auter ch’optimalas per sia equipa. Adina stuer trenar en halla, buca giu la pusseivladad dad ir en in camp da trenament e liungs viadis a giugs amicabels. Ell’Engiadina gioga il ballapei ina rolla plitost mediocra, auters sports domineschan, plirs giugadurs lavuran el turissem (quei che ha per exempel impediu da saver ir en in camp da trenament) ed il diember da giugadurs sereducescha pli e pli. Tuttina ei la finamira ton dils giugadurs sco era dil trenader da Schlarigna quella da far il pass en 3. ligia. Jola spera fetg ch’ei reusseschi da vegnir pli efficients ell’offensiva. Ei drovien bia memia bia schanzas per realisar gols. En quei grau spera el sin ina migliur.

Els giugs amicabels hagien ei bein dau in bien ballapei sch’ei vessi mo funcziunau meglier cun sittar gols. El menziunescha ch’ei seigi buca sempel da conquistar igl emprem plaz final en gruppa 1. Trun/Rabius seigi in ferm adversari ed era la secunda da Schluein/Glion seigi buca sempel da dumignar. La suletta equipa che hagi priu giu puncts ad els gl’atun vargau seigi stau Danis-Tavanasa. Sia equipa seigi aunc pli stada alla testa suenter la runda d’atun, e la primavera hagi il success lu muncau. Quei veglien els evitar questa primavera e far il pusseivel da restar alla testa dalla tabella entochen alla fin dalla sesiun per allura far il pass en 3. ligia.

Ils ulteriurs 
concurrents

Pil trenader dalla secunda da Schluein/Glion, Corsin Derungs, va ei per mantener il tierz rang ella tabella. Era sch’el savessi magari ir per in giugadur ni l’auter dall’emprema vul el buca far quei pass. El vul dar cun ses giugadurs dil cader dalla secunda che cumpeglia 22 giugadurs, pia in relativ grond cader cun buns giugadurs da 4. ligia, e cun quels vul el dar ils giugs da primavera. La collegialitad en sia squadra seigi buna e quei duei restar aschia.

Sandro Cathomas, trenader da Danis-Tavanasa, va cun in bien sentiment ella secunda part dil campiunadi. El spera che la situaziun actuala da siu cader resti aschia ch’ei reusseschi da dar ils giugs senza pli bia blessuras. Els trenaments dil davos temps ei era il giugadur che ha muncau pli liung temps all’equipa, Gianin Derungs, puspei sin buna via da reconvalescenza ed il trenader spera ch’el sappi puspei esser activs els giugs che suondan. Il camp da trenament a Tenero ei staus frequentaus fetg bein ed era il giug amicabel enteifer quei camp seigi staus positivs. Dumengia proxima retscheiva la USDT la secunda da Domat o Mutteins.

Berri Philipp, il trenader dil CB Sursès, ei insumma buca staus cuntents culla raccolta da diesch puncts ord ils giugs d’atun. El spera e spetga dapli da sia squadra el decuors da questa primavera. Ivan Brunold, trenader dil CB Laax, ei optimists ch’ei gartegi als da Laax da mantener il plaz en 4. ligia e che sia equipa fetschi stedi progress. Il davos giug ella runda d’atun culla victoria encunter Panaduz ha dau in bien stausch motivaziun als da Laax ed els speran sin ina buna partenza ella secunda mesadad dil campiunadi e ch’els ve-gnien buca pli el possess dalla latiarna cotschna.

Els han stuiu desister d’in camp da trenament, han denton gia saviu trenar relativ baul sil plaz artificial da Laax ed han dau dus giugs amicabels sco preparaziun. Igl emprem giug da questa fin d’jamna encunter Trun/Rabius ha stuiu vegnir spustaus aschia ch’il campiunadi per quellas duas squadras entscheiva pér ina jamna pli tard.