Midada en la 
Casa Alva a Trin

(cp) La fin da zercladur surdattan Lucia Monn e Corsin Pally suenter diesch onns il manaschi dalla Casa Alva a Saskia e Reto Gadola. Ils 26 da fenadur retscheivan ils novs hospitonts ils emprems hosps. Reto Gadola (38), carschius si a Rabius, ei cuschinier gastronom cun certificat professiunal federal. El ha absolviu igl emprendissadi da cuschinier a Mustér ed acquistau sia qualificaziun da Gault-Millau en casas renomadas a Turitg, Heidelberg e Basilea. Dapi siat onns eis el schef da cuschina e commember dalla direcziun el hotel e restaurant Anker a Teufen/AR. Sia dunna Saskia ha medemamein 38 onns e deriva dalla Germania dil nord, nua ch’ella ha fatg igl emprendissadi da hotellaria. Suenter quella scolaziun ha ella luvrau els medems marcaus sco siu um e terminau 2008 a Heidelberg la scola da hotellaria sco economa per manaschis da hotel cun diplom statal. Sper sia rolla sco mumma da treis affons survescha ella dapi 2012 ella «Truube» a Gais, in restaurant cun steila el Guide Michelin.

Saskia e Reto Gadola semiavan dapi liung temps da sefar independents. La Casa Alva a Trin cun restaurant e sis combras per hosps ei per els in liug preferiu e corrispunda exact a quei ch’els encurevan. «Nus selegrein fetg da vegnir el Grischun. Per nus eis ei ina gronda schanza da saver surprender il manaschi che Lucia Monn e Corsin Pally han manau cun grond success, e da metter novs accents.»

Monn ei ella vegliadetgna da pensiun e vul uss prender pli lev, ed il topcuschinier Pally selegra sin ina nova sfida. Omisdus ein perschuadi ch’ils conjugals Gadola ein ils successurs ideals per manar vinavon il manaschi ch’els han tgirau cun grond engaschament e bien success.