Raiffeisen stritga 
fin a 200 plazzas

La Banca Raiffeisen vul restructurar l’interpresa. Per quest motiv ha ella lantschà differentas mesiras da spargn e restructuraziun. Fin il 2020 vul la banca spargnar radund 100 milliuns francs. Sco la banca scriva en ina communicaziun sajan maximalmain 200 plazzas pertutgadas da la reducziun. Ina part signifitganta da la reducziun duai vegnir cuntanschida entras fluctuaziuns natiralas e pensiunaments anticipads. L’onn passà aveva la terz gronda banca da la Svizra stuì magunar ina ferma digren dals gudogns. Cun 540 milliuns francs era il gudogn sa reducì per bunamain la mesadad u per 400 milliuns francs. La banca aveva argumentà il minus cun rectificaziuns da la valur sin participaziuns da l’anteriur schef da la banca Pierin Vincenz. La banca ha plinavant communitgà ch’ella introduceschia novas structuras tar ils departaments. En il futur duai dar dus novs departaments. D’ina vart il departament «Service Banca Raiffeisen» che duai esser responsabels cunzunt per marketing e sustegn da commerzi, da l’autra vart il departament «Clientella e filialas» che duai cumpigliar tuttas purschidas da la banca en connex cun clientella.