Christian Klucker a la 
Scola òlta populara da Turitg

(anr) Durànt tres seras referescha Christian Klucker a la Scola òlta populara da Turitg sur da Tumasch a Benedetg Dolf. Igl ancunaschaint dirigent da cors da giuvenils introdutgescha audituras ad auditurs an la veta a l’ovra digls dus grànds cumponists da Schons. Christian Klucker igls mussa igl mund, agl qual lur cumposiziùns en vagnidas stgafidas. El preschainta igl bab Tumasch sco rimnader da canzùns popularas a renumo cumponist d’egn grànd stgazi da canzùns rumàntschas ca s’odan oziglgi tigl repertori da mintga cor rumàntsch grischùn, a preschainta igls marets digl fegl Benedetg sco stgafider dad ovras artisticameing ple pretensiusas c’igl vala la fadeia da scuvrir. Klucker elavura ear practicameing singulas canzùns cugls partizipànts da quels curs.

Plenavànt magna Klucker igls 22 da zarcladur l’excursiùn «Segls fastezs digls Dolfs» a Maton par mussar agls partizipànts da quels curs, quànt anavànt ca las canzùns a la musica digls dus cumponists da Schons en culieadas cun liac a cuntrada da lur darivànza. A Maton vean trànter oter ear visito la tgea paterna digls Dolfs, igl vean canto an baselgia a s’antupo cun indigens a suaintervagnànts digls cumponists.

Las seradas cun Klucker ân liac an la Scola òlta populara da Turitg, Bärengasse 22, mintgame las gievgias digls 2, 9 a 16 da matg. Ellas cuzan da las 17.30 antoca las 19.00.