Il plaschair da giovar teater sta i’l center

(anr/fa) Pella terza jada invida il Teater da Cuoira al «BEST Festival». 21 classas da scoula d’üna dunzaina da cumüns in tuot las trais regiuns linguisticas dal Grischun sco eir üna classa dal chantun Turich piglian part al festival a Zuoz. Passa 330 uffants e giuvenils da Churwalden, Cuoira, Lostallo, Malans, Panaduz, Puntraschigna, Razén, Tusan, Tumegl, Versomi, Zezras e Zuoz as partecipeschan quist’eivna fin in venderdi al terz «BEST Festival». Da la partida es, sco giast, eir la 6avla classa da la scoula Chriesiweg da Turich. Il nom dal festival da teater per scoulas es ün gö da pleds: «Our da la scurznida per Bündner Schultheaterfestival haja dat BEST chi’d es eir güsta il pled inglais pel meglder», disch Loris Mazzocco chi’d es pedagog da teater al Teater da Cuoira. El es respunsabel pels tocs per uffants e giuvenils chi vegnan muossats in quist teater illa chapitala grischuna. «I’l center d’eira fin qua adüna il giuvenil sco spectatur», manzuna’l. Mazzocco laiva daplü.

Dal spectatur a l’actur da teater

Il pedagog da teater deriva da l’Argovia. Illa Scoul’ota pedagogica ad Aarau vain il teater per e cun uffants promovü fingià daspö plüs decennis cun organisar festivals da teater pella generaziun giuvna. «In Grischun nu daiva fin quella jada ingüna fuorma coordinada da teater pellas scoulas, perquai es nada l’idea d’organisar eir qua ün sumgliaint festival», as regorda Mazzocco, «mincha scolara e scolar dess almain üna jada dürant ils nouv ons da scoula pudair tour part al festival BEST, d’eira nossa visiun.» Ils prüms duos festivals han gnü lö i’l Teater da Cuoira. Causa la topografia esa in Grischun plü difficil pellas differentas classas da tour part al festival illa chapitala grischuna: «Quellas p. ex. da Poschiavo o da Samignun han ün lung viadi fin chi sun a Cuoira. Perquai vaina decis dad ir eir utrò a realisar il festival, il terz es ingon i’l Lyceum Alpinum a Zuoz.»

«Sainza vulair as concurrenzar»

Cul sustegn da pedagogas e pedagogs da teater han sviluppà e preparà ils uffants e giuvenils a partir da la 5avla classa lur agens tocs teater. Chi poss’esser chi hajan survgni ün tema, üna chanzun o chi hajan gnü aignas ideas, disch Mazzocco, «il böt es da promouver la creatività dal singul e da la gruppa.» Quels tocs chi han preparà dürant 30 fin 40 minuts. Mincha di dal festival preschaintan vicendaivelmaing quatter classas, ün di tschinch, lur tocs teater. Davo las rapreschantaziuns daja üna mezz’ura posa. In quella vegnan müdadas las culissas e preparada la tecnica pella prosma classa. «Ill’aula dal Lyceum vaina fabrichà sü ün’infrastructura da basa per cha las scolaras e’ls scolars hajan il ‘feeling’ da teater pro lur preschantaziuns», declera l’iniziant dal festival BEST ed agiundscha chi nu’s tratta qua da la dumonda chi chi haja muossà il meglder toc, «i nu dess esser üna concurrenza, l’important es la festa cumünaivla pel teater.»

Eir la reacziun in fuorma da teater

Davo giantar sta l’uschenomnà «Rückspiel» sül program: Las singulas classas dan ün rebomb als tocs chi han vis dad otras classas. «Quai fan las scolaras e’ls scolars sainza dovrar la lingua, dimpersè eir els in giovond teater», explichescha Mazzocco, «els as laschan inspirar da quai chi han vis e preschaintan cuortas sequenzas, sco üna sort resposta al toc chi han vis.» Quist on es da la partida eir üna gruppa da giuvenils chi rapporta dal festival. Ses scolaras e scolars ill’età da 16 ons e plü vegls scrivan, «cul sustegn dal dramaturg Albrecht Lehmann da Turich», da maniera schurnalistica contribuziuns davart ils tocs chi vegnan preschantats ill’aula dal Lyceum a Zuoz. Lur contribuziuns vegnan mincha di publichadas online sün www.suedostschweiz.ch. «Invidats da gnir a verer ils tocs sun in prüma lingia las classas da scoula, ma sch’inchün oter less eir gnir es el bainvgnü», conclüda Mazzocco cul giavüsch cha quellas persunas s’annunzchan pro el per telefon 078 774 74 10.

Ulteriuras infuormaziuns:

www.theaterchur.ch/best