Una serata italiana

DAD OSKAR HUGENTOBLER

Igl Cor viril d’Andeer sut la batgeta dad Ingrid Schütz Gasparini â gieu grànd suczess cugls seas conzerts digls 5 a 6 d’avregl interpretànd canzùns talianas. Quellas ân survagnieu vigur ear graztga agl rinforzamaint digls 14 cantadurs giastànts. Igls cantadurs digl Cor viril d’Andeer an tgamischas cotschnas ad igls giasts an tgamischas neras ân ear sapreschanto opticameing bagn agl numerus publicum.

La grànda part da las canzùns talianas preschantadas en baladas. Ingrid Schütz Gasparini â raquinto lur istorgias ad istorgietas avànt mintga producziùn. Ascheia â’l igl publicum gieu igl plascher a la favur da giuder dublameing quellas baladas, an las qualas igl e l’amur ca gioia par ordinari egna grànda rola.

Surtut impressiunànt e’gl sto da tarlar la midada da pianissimo a fortissimo c’igl cor â musso agl sieus tgànt. Cun sieus program da canzùns agl lungatg digls noss vaschegns agl sid â’l igl Cor viril d’Andeer fatg resunar stupentameing igl spiert talian.

Las canzùns cun las melodeias plagn santimaints da Bepi de Marzi earan poc ancunaschaintas agls auditurs da qua, cuntrari a las fetg renumadas canzùns popularas sco «La Montanara», «Quel mazzolin di fiori», near «Aveva gli occhi neri, neri, neri» par numnar me egn pêr. Plenavànt e la canzùn populara «La rosa alpina» vagnida aranschada stupentameing dad Schütz Gasparini.

Luca Maurizio fa rir a partartgear

Igl cabaretist bergiagliot Luca Maurizio ca stat a Tumegl â betga me procuro par risadas cugl sieus intermez cabaretistic, el â dantànt ear do da partartgear cun las sias sgnocas. C’igl sampugn grànd par exaimpel eari betga me da muntada pigl quet a la parschuasiùn da sasez digl «Ursin», mobagn ca quel segi ànc adigna impurtànt par divers politicers, â Maurizio musso vasevlameing cun gèsts corespundents. El â ear capieu d’animar igl publicum da cantar cun el las canzùns c’el â acumpagnieu cun la ghitara.

Suainter igl intermez teatral da Maurizio â’l igl cor viril puspe fatg resunar pliras canzùns da Bepi de Marzi. Betga stgieu mantgear â natiralmeing «La Montanara».

Cun la suleta canzùn digl Grischùn talian «La sera» da Lorenzo Zanetti â’l igl cor viril concludieu igl sieus conzert. Quella canzùn veva’l igl cor viril gea canto pliras geadas a caschùn digl «Tgànt d’on vigl», ple bòld ànc da cuminànza cugl cor maschado c’e vagnieu schlieu igls 2014. Ascheia en vagnidas svaglieadas ragurdànzas da melancuneia agls cors da bagnanqual auditur.

Ca la populaziùn da Schons ancanuscha bagn canzùns talianas a tessinesas âni damusso a la fegn da la «serata italiana»: Igl publicum â giudieu zund da cantar da cuminànza cugl cor viril anzaquàntas canzùns generalmeing ancunaschaintas. Ascheia en l’italianità a la vaschinànza cugl sid vagnidas zelebradas an tuta furma ad Andeer a caschùn d’amaduas seras da conzert digl cor viril.