Igl president candidescha per la suprastanza svizra

DA GION NUTEGN STGIER / ANR

Roland Farrér, igl president cantunal digls pumpiers, è nia confirmo an sies uffezi. Alla fegn da zarcladour duess el neir eligia ainten la suprastanza dall’Associaziun digls pumpiers svizzers. Igl 2018 èn igls corps da pumpiers digl Grischun stos 1203 gedas an acziun. Sonda passada èn sa radunos a Domat igls delegos digls 56 corps da pumpiers tgi dat aint igl Grischun. President dall’Associaziun grischuna da pumpiers è siva digl 2012 Roland Farrér da Stierva. Damai è el, schi lagn deir, igl pi «ot» pumpier grischun da chels 3869 pumpiers tgi vagn an noss cantun. Sa tgapescha tgi anc pi «ot» tgi Farrér è cunsiglier guvernativ Peter Peyer, el tgi magna siva da passa treis meis igl departamaint da gisteia, siertad e sanadad. A pled è er el nia tar la radunanza da delegos sonda passada a Domat. Igl cunsiglier guvernativ da Trin ò angraztgea agls pumpiers per la lavour prestada a favour dalla publicitad.

I dovra ena buna tgira

Igl 2018 èn igls omens e las donnas digls 56 corps da pumpiers tgi vagn aint igl Grischun nias clamos 1203 gedas. Scu tgi Farrér dei ins vegia igl davos onn gia ensatge daples incendis. An acziun èn igls pumpiers pero er nias tar accidents da traffic, tar cass elementars, tar donns dad ieli e perveia d’aviouls. Deplorablamaintg vegian gist igls pumpiers digl sarvetsch stradal gia igl 2018 en pêr antops pi malampernevels tgi seian er ias profond a mintgign. Farrér discorra cò d’accidents sen veia noua tgi unfants on pers lour veta u er dalla crudada da dus aviuns cun ples morts. Igl president digls pumpiers grischuns dei tgi per buna sort ins vegia en schinumno «care team» aposta angal per igls pumpiers tgi sa nomna «Peer». A chella gruppa fetschan part persungas digl rom e tgi vegian l’experientscha tgi dovra per gidar e dar tgira agls pumpiers tgi vignan confrontos cun cass pi tragics ed er mortals. Farrér, el loda igl angaschamaint da mintga singul pumpier er perchegl tgi tots on anc ena veta da professiun dasper esser commembers digl corp da pumpiers. Menziuno ò el alloura er la tgapientscha digls patrungs da tots pumpiers. Els sa mossan solidarics ed er tolerants schi l’egn u l’oter ampluia vegia an en colp da bandunar urgent igl post da lavour per adempleir igl sies sarvetsch da pumpiers.

Igl 1998 anc 10 372 commembers

Avant 21 onns veva l’Associaziun grischuna digls pumpiers anc 10 372 commembers. Oz schea chel domber tar 3869 dels. La raschung tgi igl domber digls pumpiers è sa redutgia dad onn tar onn èn las fusiuns digls cumegns e cun chellas er las fusiuns digls corps da pumpiers. Da menziunar è er tgi aint igl decurs digls davos onns è er tar igls pumpiers nia tot pi professiunal, igl equipamaint pi modern, la tecnica ò fatg en immens progress e la scolaziun è neida per en po miglra. Eneda davigl per ena Val angal en auto da pumpiers ed oz dispona ple u manc mintga corp da pumpiers aglmanc egn schi betg ples da chels vehichels «TLF» cun en equipamaint tgi corresponda allas preteisas dad oz e tgi fò cunzont igl sarvetsch duevel. Chels vehichels costan bagn, èn dantant da gronda valour.

En nov suprastant

An tavla èn er stadas elecziuns dallas persungas tgi appartignan alla suprastanza cantunala digls pumpiers. Cun applaus on igls preschaints confirmo Roland Farrér scu president pigl bienni digls proxims treis onns. Vicepresident resta scu anfignen ossa Nicolo Bass da Strada. Da nov a chel gremi totga Martino Corfu da Lostallo tgi ramplazza Daniele Corecco da Buseno. Reelegias scu revisours èn nias Georg Häfner da Strada e Bruno Murk da Coira. Scu manadra digl post da gestiun segna anc adegna Gilda Jäger-Iseppi da Cunter.

Christian Rathgeb 
nov commember d’onour

Nia undro pigl sies angaschamaint anvers igls pumpiers è nia cunsiglier guvernativ Christian Rathgeb. Igl anteriour schef digl departamaint da gisteia, siertad e sanadad ò retschet la commembranza d’onour dalla Associaziun grischuna da pumpiers. Da chella undrientscha è el sa musso ple tgi ventirevel. Igl 2020 è en onn da festa per igls pumpiers da noss cantun cun aveir lour uniun tetgala igl giubileum da 125 onns. La festa da giubileum cun bleras attracziuns ò li igls 6 da zarcladour 2020 a Tusang ed ella è publica. Aint igl decurs digl 2021 è l’Associaziun digls pumpiers svizzers giast an noss cantun cun salvar la sia radunanza da delegos aint igl Grischun.