La populaziun ei carschida pli pauc igl onn 2018

da Martin cabalzar

La fin da 2018 habitavan 8 542 300 persunas en Svizra. Quei ein 58 200 persunas ni 0,7% dapli ch’igl onn precedent. La populaziun ei pia carschida per meins che 1%, quei che corrispunda pressapauc al svilup dalla populaziun all’entschatta dil secund millenni. Ton il saldo da migraziun sco il surpli da naschientschas muossan ina digren. Aschilunsch ils resultats provisoris digl Uffeci federal da statistica davart il svilup dallas casadas e dallas persunas – avon onns plidavan ins aunc da fiugs ed olmas – ch’ein vegni publicai ier.

La populaziun svizra ei carschida dad 8 484 100 persunas igl onn 2017 sin 8 542 300 persunas igl onn 2018 (+0,7%). Cun excepziun da Neuchâtel e dil Tessin ei la populaziun carschida en tut ils cantuns svizzers. La reducziun el cantun Neuchâtel ei d’attribuir alla depopulaziun, la digren el Tessin al surpli da mortoris. Il pli fetg ei la populaziun carschida en cumparegl cugl onn precedent el cantun Sviz, numnadamein per 1,2%.

Il saldo da migraziun ei il factur 
il pli impurtont per il carschament

Igl onn 2018 ha la Svizra dumbrau 171 700 immigraziuns, quei che corrispunda ad in augment da 0,4% en cumparegliaziun cugl onn precedent. Dils immigrai ein 24 000 persunas d’origin svizzer e 147 600 persunas da naziunalitad jastra. El medem mument ei il diember dils emigrants carschius per 0,9% sin 126 200 persunas. Da quellas ein 31 800 stadas da naziunalitad svizra e 94 400 da provegnientscha jastra. Il saldo da migraziun ei sesminuius ina gada dapli (– 1,0%), quei che corrispunda a 45 500 persunas. Ils cantuns Sviz e Turitg han giu en proporziun cun lur populaziun il pli grond saldo da migraziun e quei ton egl exteriur sco enteifer la Svizra.

Il surpli da naschientschas, quei vul dir la differenza denter naschientschas e mortoris, ha medemamein effectuau che la populaziun svizra ei carschida. El ha muntau a 18 600 persunas (valeta provisoria) ed ei aschia per 8,9% pli bass ch’igl onn 2017. Il pli aults eis el staus el cantun Friburg, ferton ch’il Tessin sto registrar il pli grond surpli da mortoris.

La populaziun da derivonza jastra 
ei carschida meins ferm

La fin da 2018 vivevan 8 542 300 persunas en Svizra. Da quellas eran 6 395 300 da naziunalitad svizra e 2 147 000 da provegnientscha jastra. Il diember dallas Svizras e dils Svizzers ei carschius per 37 600 persunas (+0,6%) en cumparegl cun 2017. La populaziun jastra cun domicil stabel en Svizra ei carschida per 20 600 persunas (+1,0%) enviers 2017. Ferton che la cumpart dallas Svizras e dils Svizzers vid igl augment dalla populaziun ei stabila dapi 2014 observan ins ina reducziun tier la populaziun jastra.

La pli aulta procentuala dalla populaziun jastra registreschan ins el cantun Genevra cun buca meins che 40 pertschien. Il diember dils vischins da naziunalita jastra ei carschius da 198 600 igl onn 2017 sin 199 800 igl onn 2018 (+0,6%). La pli pintga quota dad jasters vegn registrada cun 11% el cantun Appenzell Dadens. Leu ei il diember da persunas da naziunalitad jastra sesminuius per 0,7 pertschien sin 16 100 persunas.

La populaziun vegn adina 
pli veglia

La populaziun dalla Svizra cumpeglia adina dapli persunas d’aulta vegliadetgna, ina cumpart essenziala da quellas persunas ein dunnas. Il diember da persunas sur 65 onns ei carschius dad 1 550 400 igl onn 2017 sin 1 577 600 igl onn 2018 (+1,8%).

Igl onn 2018 eran 18% dalla populaziun svizra pli vegls che 64 onns, 20% eran denter 0 e 19 onns. Tiels pensiunai sur 64 onns dat ei 80 umens sin 100 dunnas, tier la vegliadetgna denter 20 e 64 onns datti 102 umens sin 100 dunnas. Las dunnas ch’han dapli che 64 onns ein adina stadas representadas cun ina cumpart pli gronda che quella dallas dunnas sut 20 onns (20,3% viers 19,3%). Cuntrari ei la cumpart dils umens ella gruppa dils seniors aunc adina pli pintga che tier quella da quels ch’ein pli giuvens che 20 onns (16,6% enviers 20,7%). Il pli ferm representai ein ils seniors da 65 e pli vegls cunzun el Tessin cun ina cumpart da 22,6 pertschien. La pli pintga ei la cumpart dils seniors el cantun Friburg cun 15,7%. Il diember dallas persunas sur 80 onns ei carschius per 2,2% sin 443 900 persunas. Sils seniors da sur 79 onns cumpetan 61 umens sin 100 dunnas. Fleivel 1600 persunas han 100 onns e dapli. Quei diember ei carschius en cumparegl cun 2017 per 4,4%. La relaziun denter umens e dunnas tier las persunas sur 100 onns munta a 20 umens sin 1000 dunnas.