Tschercan success cul velo da muntogna

(anr/ac) Marcus Weber e sia Catrina Experience vulan seposiziunar ella sparta da velo da muntogna e sponsurescha da niev in’equipa da mountainbike. Dalla partida ein dus giuvens ciclists da muntogna sursilvans, Vital Albin ed Ursin Spescha. Las finamiras turisticas e sportivas ein sepresentadas il vendergis vargau el torritori da skis da Mustér sin 2500 meters sur mar. La situaziun ei probabel stada in novum per ils collaboraturs dallas pendicularas da Mustér respectiv dallas duas sutgeras che meinan normalmein skiturs entochen all’ustria Lai Alv sin 2500 meters sur mar. Els han giu da cavigliar tschun velos da muntogna sin las sutgeras il vendergis vargau e dus da quels s’audan als dus giuvens ciclists sursilvans Vital Albin ed Ursin Spescha. Omisdus fan da niev part dall’equipa da mountainbike Thömus Swiss Bike Team da Ralph Näf. In num ordvart current ella scena da sport dils velos da muntogna. Näf ei staus activs sur onns sco ciclist da muntogna e cuntinuadamein davontier ella rangaziun dil Cup mundial e nudaus ellas annalas denter auter sco campiun mundial dil maraton da mountainbike. El ha integrau, sper ils dus Sursilvans, ulteriurs talents e sportistas versadas en sia nova equipa. Alessandra Keller e Kathrin Stirnemann han gia mussau lur habilitads sportivas e cun Mathias Flückiger ei in mountainbiker cun dabia experienza dalla partida. Per ina dallas treis top equipas da mountainbike dalla proxima sesiun vegn la nova equipa da Näf valetada, sco igl ei stau d’udir ell’ustria da muntogna da Lai Alv il vendergis vargau. Buc igl ambient alpin d’unviern ha carmalau Näf e sia equipa sin 2500 meters sur mar, mobein la collaboraziun cun Marcus Weber e sia Catrina Experience. Il tgamun dallas pendicularas da Mustér e realisader dalla residenza nova ella vischionza dalla staziun da val dallas pendicularas vala sco niev sponsur principal dall’equipa da mountainbike da Näf.

Seposiziunar el sport 
da velos da muntogna

Weber ha explicau a Lai Alv ils motivs da siu engaschi el sport da mountainbike. Il Resort Catrina porscha cun ses 800 letgs potenzial che survarga per in bienton las jamnas dalla sesiun d’unviern. Il tgamun da pendicularas e resort ha explicau la necessitad da s’engaschar en favur dalla sesiun da stad ed el vesa dabia spazi per Mustér e contuorn viers il sport ed ils amaturs dil velo da muntogna. E grazia all’equipa da Näf e lur arbagias sportivas quenta Weber da puder render attent allas pusseivladads sportivas da Mustér ed alla recreaziun purschida en sia residenza. Mo quei ei buc il sulet motiv digl engaschi da Weber. El vul nezegiar il potenzial e la savida dils sportists da professiun per installar rutas da velos attractivas per persunas ambiziusas sco per famiglias e tals che tschercan buc exnum la limita corporala. Realisar quellas rutas da velos vul Weber cun la clara intenziun da zavrar velocipedists e viandonts. Menziunau ha el la collaboraziun regiunala e discurriu dalla necessitad da surmuntar ils mirs existents denter Mustér e Sedrun. In emprem pass en quella direcziun ha Weber gest menziunau, la nova pendiculara da Cuolm da Vi. Explicau ha Näf sias finamiras sportivas per igl onn proxim focussadas sin ils Campiunadis mundials digl uost el Canada.

Perspectivas sportivas empermettentas

Igl engaschi ella nov’equipa da Näf valeteschan ils dus ciclists sursilvans sco ordvart positiv. Omisadus fan novissimamein part dall’equipa naziunala da mountainbike ed han discurriu dad in niev ambient fetg professiunal che lubeschi da seconcentrar in bienton meglier sil sport. Ursin Spescha ha plidentau las arbagias sportivas dil tgamun dall’equipa. Ed el quenta da puder profitar sco giuven sportist dallas experienzas da Näf. La commembranza ad in’equipa professiunala levgiescha buca sulet la veta dil giuven sportist. Ella descarga era ils geniturs da lavur da promoziun purschida sur onns sco accumpignaders allas concurrenzas, sco quei ch’Ursin Spescha ha explicau. Albin ha menziunau il sustegn davart da fisioterapeuts, mecanists e gronda peisa tschenta Albin sil material mess a disposiziun dil constructur svizzer da velos Thömsus. Ils dus Sursilvans han gia mussau bunas prestaziuns els onns vargai e tschentau la basa per igl engaschi ella nov’equipa. Els partan el Cup mundial ella categoria sut 23 onns e l’emprema cuorsa dalla sesiun ha gia purtau resultats che fan curascha.