Objects sacrals cuostan

(anr/abc) En Lumnezia dat ei 33 baselgias e capluttas da differents stils, roman, gotic e baroc. Dus objects ein dapresent en palancau. La vischnaunca da pleiv Lumnezia miez renovescha s. Gudegn e s. Roc. Baselgias e capluttas surveschan buca pli exclusivamein als cartents, mobein era al turissem. La vischnaunca da pleiv Lumnezia miez posseda quater baselgias e siat capluttas ch’ella sto mantener. Igl ei buca mo viatics, mobein grondas capluttas cun altars, clutgers ed objects d’art. Duas da quellas ein dapresent en palancau. A Vignogn vegn la caplutta da s. Gudegn restaurada ed a Vella la caplutta da s. Roc. Omisdus projects cuostan 400 000 francs. A Vella han las lavurs da restaurar la part exteriura dil baghetg entschiet dacuort. La fin da mars haveva la radunonza generala lubiu il credit corrispundent. Punct central dalla restauraziun da sogn Roc eis ei da reparar ils donns ch’il traffic stradal caschuna e da ligiar giu da niev ils mirs. La caplutta da s. Roc survegn da niev ina preit da lenn larisch dad 85 centimeters. Tuttina sco s. Gudegn a Vignogn sustegnan la baselgia cantunala e la Tgira da monuments era la restauraziun da s. Roc a Vella. Damai che la caplutta amiez il vitg da Vella vegn duvrada per sepulturas sustegn la vischnaunca Lumnezia era quei project.

pagina 3