Arosa: Parc digls urs

DA GION NUTEGN STGIER / ANR

Cun dar a treis urs en nov datgesa è reuschia ad Arosa Turissem en veir cup. Igl interess per chels treis animals è fitg grond. Alla fegn da zarcladour duessigl dar aint igl li turistic digl Scanvetg en record mundial. 300 persungas cun la schlattagna Bär, Baer ed er Beer duessan far ena viseta agls treis urs. Acziuns da reclama totgan tar lis turistics scu hotels, abitaziuns da vacanzas ed er pendicularas. Per carmalar daples giasts mantgan betg ideias, impuls, inspiraziuns e stibgeidas. Savens è l’ideia pitost en «gag», dantant egn cun en immens effect da reclama. Chegl è er sto igl cass ad Alvagni cun introdueir igl Principadi da Belfort avant passa diesch onns ed ancuranar prenzi Peter igl I. El è a madem taimp er sto igl amprem ed unic prenzi da chel principadi tgi è sto en «gag» da marketing digl hotel e restorant Belfort cun Markus ed Emma Beer, varsaquants indigens ed ena rotscha digls giast fidevels digl pêr-ustier. Er Mot ò avant pacs onns fatg en’acziun da reclama sur facebook e gia en immens resung persiva. Anc bagn an regurdientscha è l’acziun da reclama da Barvogn cugl scumond da fotografar per mintga giast.

Radond
 40 000 visitaders

Bler daple tgi en «gag» è alloura l’acziun da chels d’Arosa da porscher a treis urs en nov spazi da veiver. Igl avost è nia dalla Serbia igl urs da circus «Napa» per star ad Arosa aint igl parc cun ena grondezza da treis hectaras. Digl settember anfignen igl davos otgover 2018 on radond 40 000 persungas visito igl urs «Napa». Chegl èn prest 12 gedas daples persungas tgi chegl tgi Arosa ò abitants.

En augmaint da 12% passagiers 
tar la Veiadafier retica

Tar ena retschertga tar 1000 fans digl urs «Napa» on 60% confirmo d’esser per l’amprema geda ad Arosa. 55% on er detg tgi els restan sur notg ad Arosa. En veir «boom» perveia digl urs serb ògl alloura do sur igls meds socials, cunzont sen facebook e sen instagram. Pascal Jenny, igl directour turistic d’Arosa, dei tgi sch’ins vess da paer chella reclama tgi seia neida fatga perveia digl urs «Napa» sur chels dus meds socials custess chegl tranter 600 000 e 700 000 francs. Profito digl paeis d’urs ad Arosa ò er la Veiadafier retica. Ella ò transporto igl settember ed otgover digl onn passo 12% daples passagiers da Coira ad Arosa ed anavos.

Siva digl favrer 2019 ò igl urs «Napa» cumpagneia digls dus urs albanes «Meimo» ed «Amelia». Avant curt èn tots dus urs nias operos (daints) e per buna sort è l’operaziun gartageda. Tots dus urs (el ed ella) son betg ple daventar bab e mamma cun esser tots dus urs ossa sterils. Alla fegn da zarcladour da chest onn duessan vers passa 300 persungas tgi èn aglmanc dalla schlattagna annò paraints cun igls urs (Bär, Baer, Beer) s’inscuntrar a madem mument aint igl parc digls urs ad Arosa. Scu tgi Arosa Turissem ò communitgia èn gio ossa annunztgeidas bleras persungas per chell’acziun. Igl intent da chell’acziun è da promover igl schurmetg digls urs. L’organisaziun «Vier Pfoten», ella tgi è er s’angascheda per porscher ad Arosa en nov datgesa per igls treis urs, sustigna l’acziun pigl schurmetg digls urs.

I dat er en program lateral chel de tgi vo per en nov record mundial da visitaders dad urs e naturalmaintg ò mintga occurrenza da far ensatge cun igls «grizzlys», scu tg’ins nomna er igls urs.