Spescha Dance presenta

(anr/abc) Damaun, sonda, e dumengia, il di dallas mummas, envidan 61 mattatschas e giuvnas dunnas ad ina sera da divertiment ella halla plurivalenta a Vella. Spescha Dance, cun Gionina, Marianna e Fabiola Spescha, presenta ina show cun producziuns da sault. Tuttas sis gruppas ein puspei semtgadas da mussar quei ch’ellas han exercitau dapi igl atun vargau. Las participontas, naven dalla scoletta tochen tier la gruppa Move System dallas soras Spescha, presentan in program cun coreografias e musica. Avon la pausa saultan las gruppas cun tocs da musica moderna e dils charts actuals. Ella secunda part dat ei producziuns tier la tematica «Rock». Igl ei la secunda gada che Spescha Dance organisescha quell’occurrenza per egl ed ureglia. Igl onn vargau havevan 52 mattatschas e giuvnas dunnas mussau ina show dinamica, uonn eis ei 61 che presentan lur plascher dil moviment, coordinaziun e fitness. En tut san ils aspectaturs guder 15 tocs, in maletg sustegn mintga coreografia tenor il tetel dil toc.

La sera da Spescha Dance a Vella ei sonda, ils 11-5-2019 allas 19.00, e dumengia, ils 12-5-2019 allas 16.00, mintgamai en halla plurivalenta a Vella.