Capaul per Cathomas

Dad Augustin Beeli / ANR

Il club da golf Buna Vista Sagogn e la societad Golf Sagogn Schluein SA han envidau sonda alla radunonza generala. Quella ha eligiu Christian Capaul sco niev president. Treis puncts ein stai el center dalla radunonza annuala dils acziunaris e commembers. Inagada ei quei il meglier quen annual dapi che la societad exista. Quel ha il president Leo Cathomas presentau sonda als acziunaris e commembers presents ella halla plurivalenta a Sagogn. Las mesiras instradadas avon quater onns muossan effect ed influenzeschan positivamein la gestiun. Sco secund punct dalla 13avla radunonza generala dalla Golf Sagogn Schluein SA ein las elecziuns stadas el center. Suenter esser staus tschun onns al tgamun dalla societad ha Cathomas surdau il presidi. Il zercladur 2014 eis el vegnius eligius ed ha giu da surprender la funcziun da reorganisatur d’ina societad che fuva vidlunder da far naufragi. Sco siu successur ha la radunonza generala eligiu il vicepresident Christian Capaul, Laax. Sper il president Leo Cathomas han dus ulteriurs commembers dil cussegl administrativ demissiunau, numnadamein Reto Gurtner ed Anne Bindschädler. Quater persunas han candidau per treis posts. Suenter las elecziuns han il president partent ed il captain dils umens, Roland Anderegg, informau dil stan dallas contractivas pertuccont la cumpra dalla casa dil club.

pagina 3